Ilinniartut aatsaat taama amerlatigaat

Taamaalilluni ilinniartitaanermullu pilersaarummi sulisut 2/3-iisa 2020-mi piginnaasaqalerfiusumik ilinniarsimanissaannik anguniagaq angujartuaarneqalerluni.

Amerlanerpaat, tassa 3400-t missaanniittut nunatsinni maani ilinniarput. 600-t missaanniittut nunani allani ilinniarput, pingaartumik ilinniartitaanerni qaffasinnerusuni ingerlaqqiffiusunilu.

Taama ilinniartitaanermi naalakkersuisoq Mimi Karlsen (IA) nalunaarpoq.

- Inuusuttut taama amerlatigisut ilinniagaqarnissap pisariaqarneranik oqariartuummik paasinnissimanerat nuannerpoq. Sulili amerlanerusut ilinnialertariaqarput atuarfimmit aninerminni pilertoqqunartumik. Maannakkorpiaq ilinniartitaaneq pillugu politikimi suliassat annersaraat init atuartitsiviit ilinniartullu ineqarfii pillugit illutat naammannissaasa qularnaarneqarnissaat. Maannakkorpiaq sammineqartorujussuupput ukiunilu makkunani ilinniartitaanermik suliassaqarfiup annertusarneqarujussuarnissaa sammineqarpoq, Mimi Karlsen oqarpoq

Ilinniarfinnut tamanut qinnuteqartartut amerlisimapput kiisalu inuussutissarsiutinut tunngaviusumik ilinniartitaanerit ilinniarnertuunngorniarfiillu akornanni oqimaaqatigiilluartoqarpoq. Tamatumunnga peqatigitillugu amerlanerusut assersuutigalugu atuarfimmi ilinniartitsisutut, isumaginninnermi perorsaasutut peqqissaasutullu ilinniartitaanermik qaffasinnerusumik ingerlaqqiffiusumillu ilinnialersimapput, MImi Karlsen nassuiaavoq.