Kujataata kommunerujussua ilinniartoqarfissuaq

Kujataata kommunerujussua ilinniartoqarfissuaq Maanna qineqqusaarneq aallartiinnaqaaraasiit kujataatalu siunissaata aaliangiiffigineqarnissaanut oqallinnermi ilanngussilaarusuppunga.Múte Bourup Egede, QaqortoqPartiit qineqqusaartut amerlanerit qineqqusaarutigaat kommunerujussuassarput ilinniarluarsimasunut orniginartuussasoq taamaalillunilu ineriartorfissuussasoq. Tamannali angussagutsigu pisariaqarpoq kujataani ilinniartut atugarissaartinnissaat. Ilinniartummi atugarissaartitaagunik misigisaqarluassapput misigisaqarluarunillu ilinniarnertik naammassigunikku maannga kujataanut uterusussinnaanissaat annerussaaq. Taamaammat pisariaqarluinnarpoq kommunerujussuassatta aqutsisorigallagassaasa, inuusuttut ilinniartullu atugarisaat eqqarsaatigilluassagaat!Ilinniartut suliffissaqartinnissaannut qularnaveequsiineqIlinniartut qularnaviikkanik suliffissaqartitaasinnaanerat aqutsisorigallagassatta ilinniartut atugaannik pitsanngorsaanissaminni suliniutissatsialarisinnaavaat. Pingaarporli oqaatigissallugu illinniartut pinngitsaalineqarlutik sulitinneqassanngimmata, kisiannili piumasut suliffissaqartinneqarsinnaassasut. Ilinniartut qularnaviikkanik suliffissaqartinneqarsinnaanerat isumassatsialaavoq pissutigalugu:

· Ilinniartut ilinniarnermorsiamik saniatigut aningaasarsiaqarlutik ilorrisimaassapput. Ilinniartuttaaq aningaasaateqarnerulersinnaanerat kujataani inuussutissarsiutilinnut iluaqutaalluarsinnaavoq.

· Ilinniartut kujataanut sungiussilluarlutik, angerlamasutut tikilluaqqusaasutullu misiginissaannut atorneqarsinnaasut pitsaalluartut ilagaat. Ilinniartut kujataani ilisarisimasaqarlualissapput inuusaaserlu qanoq innersoq misigalugu.

· Ilinniartut suliffeqarfiillu suleqatigiinnermik aallartitsisinnaapput, ilinniartup siunissami ilinniaqqinnermini atorluarsinnaasaanik, soorlu: suliaqarnermini misilittakkani atorluarsinnaallugit il.il. Taamatut suliffeqarneq aamma ulluinnarni ilinniarnermi soorlu allaaserinninniartilluni isumassarsiorfitsialaasinnaavoq.

· Misissuinerit takutissimavaat ilinniarnerup saniatigut piffissami aaliangersimasumi sulisaraanni ilinniarnermik naammassinnissinnaaneq sukkanerusartoq. Ilinniartoq sukkanerusumik ilinniarnerminik naammassinnikkunittaaq nunatsinni ilinniarluarsimasut amigaatigisagut saukkanerusumik pisinnaavagut. Ilinniarnermik unitsitsiinnartarnertaaq taamaaliornikkut akiorluarneqarsinnaavoq.

· Ilinniartut misilittagaqarlualissapput akisussaassusermillu pingaartitsineq ilikkarlugu. Ilinniartut eqeersimaartunngussapput, nutaamik eqqarsartunngorlutik isummersullammanngorsinnaallutillu, tamakkulu nunatsinni pisariaqarteqaagut.

· Inuussutissarsiortunuttaaq pitsaalluinnassaaq siunissami sulisussarisinnaasaminnik aalajaatsunik nassaarnissaat ammaanneqassammat. Isumassarsiaq una kikkunnut tamanut iluaqutaalluartussaavoq, kujataata ineriartornerata iluaqutigilluarsinnaasaa.

Ilinniartut qularnaveeqqusikkamik suliffissaqarsinnaatitaanerat Odensip kommuniata 1 september 2008 atulissamaarpaa, ilinniartuutitik pitsaasumik atugassaqartikkusullugit. Illoqarfiit allat nunarsuatinni ilinniarfeqarfiusut ilinniarfigitigit nunatsinnilu kommunerujussuit pitsaanersaattut alloriarneq tigullugu. Unali suliniutaasinnaasoq piviusunngortinneqassappat pisariaqarpoq suliffeqarfiutillit pisortallu isumassarsiamut ammassasut iliuuseqarusullutillu.

Inuusuttut isumasioqatigiivi

Tamatta nalugunanngilarput maani Qaqotumi kommunerput inuusuttut isumasioqatigiivinik pilersitsinikuusoq, tamanna isumassarsiatsialassuuvoq! Isumaqarpungali inuusuttut isumasioqatigiivi ilatsiinnarpallaarsimasut taamaalillutillu assiliaataannanngupajaarlutik. Pisariaqarsoraara inuusuttut isumasioqatigiivi pikkorissarneqartariaqartut makitinneqartariaqartullu. Taamaaliortoqarpat maani kujataani inuusuttagut nukittussapput, eqeersimaartunngorlutillu sunniuteqarlualissallutik ineriartornitsinni iluaqutigilluagassatsinnik! Apeqqusiisoqartariqarportaaq: kommunerujussuanngorutta inuusuttut isumasioqatigiivi qanoq pissappat? Kujataani inuusuttut isumasioqatigiivinik pilersitsisoqassamaarnerluni? Imaluunniit politikkeritta inuusuttut pisarnermittut puigorsimassanerpaat, killeqarfilerngusaannertik pingaartinnerunermik?! Neriuutigaara inuusuttut isumasioqatigiivi kattussuutilernitsinni puigorneqassanngitsut, tamannami uagutsinnut inuusuttunut kommunerujussuassatsinnullu ajoqutaalluinnassammat. Neriuppunga qineqqusaartut neriorsuiinnaratik siunissaq qulakkeerniarlugu eqqarsarluarumaartut.

Kommunerujussuit pitsaanersaat

Uku suliniutaasinnaasut qulaani eqqartukkakka maani kujataani iluaqutigilluarsinnaavagut, ilinniartoqarnermilu nunatsinni siuttunngorluta! Taamaalilluta ilinniarluarsimasunit ornigarneqarluarumalersinnaavugut nunattalu kujataa ineriartorfissuanngortillugu ? Kujataata kommunerujussua nunatsinni kommunit pitsaanersaat ammaallugu.