Demokraatit Erik Jensen itigartippaat
Akileraarutinik aaqqissuusseqqinneq pillugu isumaqatigiissut partiip akuersaassanngikkaa, Demokraatit siulersuisuunerisa sisamanngormat unnukkut aalajangerpaat.
Annonse
Demokraatit akileraarutitigut aaqqissuusseqqinnissamut aningaasalersuinissaq akueriumanngilaat, taamaattumillu aaqqissuusseqqinneq pillugu isumaqatiginninniarnerit naammassilersullu piffissaq kingulleq atorlugu partii peqataajunnaarpoq.
Tallimanngorpat ullaap tungaani aaqqissuusseqqinnissaq Naalakkersuisut saqqummiutissavaat, naalakkersuisullu Erik Jensenip akileraarutinik aaqqissuusseqqinnissamik siunnersuutaa itigartinniarlugu Demokraatit siulersuisuunerisa sisamanngormat unnukkut isumaqatigiissutigaat.
- Aaqqissuusseqqinneq ajunngitsunik imaqaraluarluni aningaasalersuineq isumaqatiginngilarput. Aningaasaliinissaq pillugu sivisuumik isumaqatigiinniaraluarpugut, uagulli peqataatinnata isumaqatigiissuteqartoqassaaq, Demokraatit siulittaasuat Jens-Frederik Nielsen, Sermitsiamut oqarpoq.
Qangali utaqqineqarsimasumit isumaqatiginninniarnernit peqataajunnaarniarluni sapaatip-akunnerani matumani siusinnerusukkut Atassut nalunaarpoq, siusinnerusukkullu aamma Naleraq isumaqatiginninniarnernit peqataajunnaarpoq.
"Kaasarfimmit kaasarfimmut" nussuinermik ingerlariuseqartoqassanngitsoq
Taamaalilluni aaqqissuusseqqinneq partiinit naalakkersuisooqatigiinnit marlunnit, Inuit Ataqatigiinnit Siumumillu, kisimi piumasarineqartoq piviusunngorpoq.
Aaqqissuusseqqinnerup saqqummiunneqannginnerani sooq partiip peqataajumannginnera pillugu sukumiinerusumik oqaaseqarusunnani Jens-Frederik Nielsen oqarpoq, partiilli maanna isumaqatiginninniarnernit aninera uggornartuusoq erseqqissarpaa:
- Aaqqissuusseqqinneq "kaasarfimmit kaasarfimmut" ingerlanneqassanngitsoq aallaqqaammulli oqarnikuuvugut. Tassa imaappoq, aningaasanik nussuiinnartoqassanngitsoq.
- Pisortat akileraarutinik appartitsinerannik ilanngaatinillu qaffaanerannik erseqqissumik neriorsorneqarusuppugut, taamaalillutalu pisortanut aningaasartuutit annikillisinniarlugit pisussaaffeqalissaagut.
- Peqataajunnaarnerput uggornaqaaq, taamaapporli, partiimi siulittaasoq oqarpoq.
Akileraarutit pillugit aaqqissuusseqqinneq pillugu tusagassiortunik katersortitsiniarlutik nalunaaqutaq qulinut Naalakkersuisut qaaqqusisimapput. Sermitsialli paasissutissaatai naapertorlugit nalunaaqutaq aqqanermut kinguartinneqarpoq.
