Atassut isumaqatigiinniarnernit anivoq

- Atassummiit pingaartikkaluaqaarput sunniuteqaqataalluta peqataanissarput, uanili inernilertariaqarparput anguniakkat appasingaarmata allaat aaqqissuusseqqinnissamilluunniit taajuminaalluni. Taamaammat maleruutiinnarluta pituttorumanata anivugut, Atassutip siulittaasua Aqqalu C. Jerimiassen oqarpoq.

Akileraarut appartikkusuppaat

Atassut isumaqatiginniarnerniit anivoq akileraartarnikkut oqilisaataasussatuaq tassaalermat sulinermut ilanngaammut qaffaaneq - taamaallaat isertitakinnerpaanut oqilisaataasussaq, akunnattumik isertitalinnut soraarnerussutisiaqartunullu iluaqutaasussaanngitsoq, tusagassiuutitigut nalunaarummi taamak partii tunngavilersuivoq.

- Isertitakinnerpaanut iluaqutaalaartussaagaluartoq soorlumi Naalakkersuisut akunnattumik isertitallit isiginngitsuusaaraat, pingaartumik akit qaffakkiartorujussuarnerini eqqugaanerup kingorna, sulilu artukkiiaartuinnarlutik. Tamanna peqataaffigisinnaanngilarput, Aqqalu C. Jerimiassen oqarpoq.

Atassut siunnersuuteqarsimanerarpoq akileraarut appartinneqassasoq, tamanut sulineq akilersinnaanerulersikkumallugu. Tamannali Naalakkersuisuniit tusaajumaneqarumannginneragaavoq. Qanorlu sulinermut ilanngaatip qaffannera aningaasalersorneqassanersoq illuatungiliuuttutut apeqqusernartoq Atassummit tikkuaapput.

- Puunummi akitsuummiit matussuserniarneqarpoq ukiup aallartinnerani ikkunneqartoq. Naalakkersuisut innuttaasuniit 85 mio. kr.-nik arsaarinnissuteqariarlutik ilanngaatitut uterteqqippaat. Allaanngiivippoq qimmeq pamiuanik nerisinniarsaralugu, Aqqalu C. Jerimiassen oqarpoq.

Namminersortunngorsaanermut ajortisaarineq

Ukioq mannamut aningaasanut inatsimmut akuersinermut Atassut peqataasimavoq, Naalakkersuisummi siulittuutigisimavaat sodavandinut immiaaqqanullu akitsortitsinavianngitsoq. Taamatullu siulittuisimanerat eqqunngilluinnarpoq.

Atassutip siulittaasua ullumikkut imminut aperivoq qanoq ilillutik Naalakkersuisut taamak annertutigisumik kisitsinerlorujussuarsimasinnaanersut. 

- Immitsinnummi aperiinnarsinnaavugut ilumut Naalakkersuisut kissaatigisimaneraat immiaaqqanut sodavandinullu tunisassiornerup namminersortunngorsarnera ajutuussasoq, taamatullu siunissami namminersortunngorsaanissamut itigartitsinissaminnut sakkussarsillutik, Aqqalu C. Jerimiassen oqarpoq.

Atassutip isumaqatigiinniarnernit aninerminik nalunaarut naggaserpaa suli akileraartariaaseq ajornannginnerusoq naapertuunnerusorlu sukataarutigissanerarlugu.

- Naalakkersuisullu kaammattorusuppagut massakkut siunnerfigiligartik eqqarsaatigeqqeqqullugu, innuttaasunullu tamanut iluaqutaasussamik ujartueqqullugit.