politiit
Sisimiuni 17-inik ukiulik imigassartorsimatilluni biilertoq arnamik inuusuttumik apuivoq
Sisimiuni 17-inik ukiulik imigassartorsimatilluni biilertoq arnamik inuusuttumik apuivoq
Sisimiuni politiit tallimangormakkut unnukkut ulorianartumik biilimik malersuereerlutik angut inuusuttoq 17-inik ukiulik tigusaraat, taamaattooq Sisimiuni Eqqartuussiviup angut inuusuttoq iperarneqassasoq ippassaq unnukkut aalajangerpaat.
Angut 17-inik ukiulik Sisimiuni imigassartorsimatilluni sapiiserluni uloriarnartumillu biilernerata kingorna arnamillu inuusuttumik apuisimanera pillugu tigusarineqarpoq. Angut inuusuttoq napparummut aporsimavoq, tassanilu biili ikuallalersimavoq.
Eqqartuussivimmit iperangaasoq
Tigusarinninnerup misissuinerillu kingorna politiit aalajangerput 17-inik ukiulik inatsit tunngaviusoq naapertorlugu tigummigallarneqarnissaanut taasiullugu sassartinneqarnissaa aalajangiuppaat. Taamaattoq Sisimiuni eqqartuussivimiup aalajangiinermut isumaqataanatik angut inuusuttoq ippassaq iperagaatippaat.
- Unnerluussisussaatitaasut aalajangiineq nunap eqqartuussisuuneqarfianut aalajangeqqitassanngortippaa, apeqqut pillugu nunap eqqartuussisuuneqarfiata aalajangiinissaa utaqqiinnarparput. Taamak sakkortutigisumik pisoqarnerani taarsiullugu tigummingallaganngortitsisoqartariaqartoq, unnerluussisussaatitaasut tugaanniit neriuutigaarput, politiininngaanneersoq, Lars Kirkegaard oqarpoq.
Mianersuaalliortumik timimik innarliisimasutut unnerluutigineqartoq
Angut 17-inik ukiulik imigigassartorluni biilersimasutut navianartorsiortitsillunilu mianersuaalliortumik timimik innarliisimasutut, pasineqarpoq, politiinillu unnerluutigineqarluni.
Politiit paasissutissiaraa, arnaq inuusuttoq aporneqarsimasoq aqqunartitsersimaneri pissutigalugit Nuummi Dronning Ingrid Napparsimavissuanukaanneqarsimasoq.
- Paasissutissat pissarsiakka naapertorlugit taanna inuunerminik navianartorsiunngilaq, Lar Kirkegaard Sermitsiaq.AG-mut oqarpoq.
Taassuma aamma oqaluttuaraa arnat marluk allat aamma biilimit aporneqarsimasut, qujanartumillu aqqunarneqarsimanatik.
Suliaq assut ilungersunartoq
Eqqartuussiviup angutip 17-inik ukiullip iperagaanissaanut aalajangiinera tupaallaatigalugu, politiit oqaatigaat.
- Suliaq assut ilungersunartutut isigaarput, navianartorujussuarmik biilerneruvoq, taamaammaat pineqartoq inatsit tunngaviusoq naapertorlugu sassartinneqarnissaat aalajangiussimavarput, Lars Kirkegaard oqarpoq.
Nunap eqqartuussisuuneqarfiata qaqugu aalajangiussaqassanersoq politiit ilisimanngilaat.