MIO kajumissaarivoq: Meeqqat pornoliarineqarnerat tamatigut politiinut nalunaarutigisaruk

- Inatsisit unioqqutillugit assinik siammarterisarnerup misigissutsitigut kingunerisartagaasa assigaat kinguaassiutitigut kannguttaatsuliornerit. Taamaammat meeqqat pornoliarineqarneri tamarmik politiinut nalunaarutigineqartassapput, meerarlu tarnikkut ikiorserneqartariaqarluni.

Danmarkimi politiit meeqqat pornoliarineqarneranut sulianik arlalinnik ingerlatsinerisa kingorna, meeqqat illersuisuat Aviâja Egede Lynge tusagassiuutinut nalunaarummi oqarpoq.

Atuaruk: Meeqqat pornoliarineqarnerannik unnerluussut annertuumik kinguneqartitsisinnaavoq

Tarnikkut ikiorserneqarnissaat
Innarliineq pereersimappat, assillu kanngunarsaasut siammaatereersimallutik, pingaartuuvoq meeqqap tarnikkut ikiorserneqarnissaata qularnaarnissaa, meeqqat illersuisuat oqarpoq.

- Meeqqap paasissutissat assillu imminik kanngunarsaasut, imminut tunngalluinnartut killissanillu qaangiisut siammaanneqarsimanerat assigiinngitsunik qisuaraateqarfigisinnaavaa. Ilaasa pisimasoq anigupallattarpaat, allat inuunerminni ajornartoorujussuartutut misigisarput, tarnillu pissusiinik ilisimasalimmit ikiortariaqarlutik. Paasissutissanik, assinik videonilluunniit imminut tunngasunik nammineq piumasarinngisamik siammaassisoqarnera inuit amerlanerpaat puigorunnanngilaat. Taamaammat pingaartuuvoq meeqqap ikiorsernissaataa tapersersornissaatalu eqqumaffigilluarnissaa, taanna erseqqissaavoq.

MIO-p inersimasunut inassuteqaatit arlaqartut katersornikuuai:

• Meeqqanik pornoliat politiinut nalunaarutigineqassapput.
• Innarliineq pereersimappat – kingunerisassai eqqumaffigilluakkit. Inatsisinik unioqqutitsilluni assinik siammaassisoqarsimappat, eqqugaasoq kanngusullunilu imminut pisuutinnermik misigisimasinnaavoq. Kanngusunneq, meeqqap kikkunnut tamanut takusassiarineqarsimanera pissutigalugu, imminullu pisuutinneq, meeraq imminnut nittarsaannermut arlaatigut pisooqataasimasutut misigisinnaasarmat. Paasissutissat assillu imminik kanngunarsaasut, imminut tunngalluinnartut killissanillu qaangiisut siammaanneqarsimanerat assigiinngitsunik qisuaraateqarfigineqarsinnaavoq. Ilaasa pisimasoq anigupallattarpaat, allat inuunerminni ajornartoorujussuartutut misigisarput, tarnillu pissusiinik ilisimasalimmit ikiortariaqarlutik. Paasissutissanik, assinik videonilluunniit imminut tunngasunik nammineq piumasarinngisamik siammaassisoqarnera inuit amerlanerpaat puigorunnanngilaat.

• Meeqqap internetimik atuisinnaanissaanik ilinniartiguk: Meeqqat ilinnniartiguk inuup allap assinginik taamaallaat internetikkut siammaassisoqarsinnaasoq, inuk pineqartoq aperisimagaanni. Meeqqat isumaqatigiissuteqarfigiuk, akuerineqaqqaartigani assinik siammaassisassanngitsoq.

• Meeqqat ilinniartiguk arlaannit paamisaarneqassaguni qanoq iliornissaanik: Meeraq ilinniartigiuk ilisarisimanngisaminik allaqateqartassanngitsoq. Assersuutigalugu meeraq siunnersoruk ilinnut inersimasunulluunniit tatigisaminut saaffiginnittaqqullugu; inuup pineqartup qanoq mattunneqarsinnaaneranik meeraq ilinniartiguk. Ilinniartiguk taama pisoqartillugu politiinut saaffiginnissinnaaneranik. Meeqqat ilinniartiguk ikinngutigiumannittut kikkut akuerinissaat ajunnginnersoq kikkullu naaggaartariaqarnersut.

  Meeqqat ilinniartiguk imminut pilluni paasissutissat suut internetikkut siammaassinnaanerai: Assersuutigalugu pitsaanerpaavoq ullut inuuiit, najugaqarfiit telefonillu normui siammaatinngikkaanni.

• Meeqqavit internetikkut pissusilersornera soqutigalugu malinnaavigiuaruk: Meeqqamut naleqqiullugu paasinnilluartarit, ammasuullutit utaqqisinnaassuseqarlutillu. Meeraq tatigalugu takutiguk, terlinganiik misissugarinagu.

• Meeraq oqaloqatigiuk inuppassuit isumaqartartut allat tamarmik taamaaliortartut: Meeqqat inuusuttullu arlalipassuit isumaqarsinnaasarput, akuerineqaqqaarani assinik siammaassisarneq nalinginnaalluinnartuusoq.

Meeqqanik ikiorsiissutaasinnaasut ilitsersuutillu uaniipput
Nakuusa meeqqat atugaannik pisinnaatitaaffiinillu pitsanngorsaanissamik pingaarnertut siunertaqartoq, siunissami qaninnermi kinguaassiutitigut atornerluisarnerit pillugit paasititsiniaanermik saqqummiussissaaq.

Meeqqat Ikiortigit – Red Barnet – aammattaaq meeqqat internetertarneranni ulorianarsinnaasut eqqumaffigaat, taamaammallu suliniut ”Chat paaralugu – Sikker Chat” aqqutigalugu internetikkut isumannaatsuunissaq qitiutillugu sammissamaarlugu.

MIO-p meeqqanut inuusuttunullu toqqaannartumik saaffiginnissutitut inassuteqaatit MIO-p Facebookkikkut nittartakkaminut ikkutissavai. Tassani meeqqat inuusuttullu atuarsinnaavaat, ikiorneqarlutillu siunnersorneqarsinnaagamik MIO-p SMS-ikkut siunnersuisarfia aqqutigalugu, tassalu ”SMS 1899”.
Tamatuma saniatigut meeqqat inuusuttullu Meeqqat inuusuttullu oqarasuaataannut sianersinnaapput uunga: 134.

Aamma atuakkit:

Inuusuttut 1000-t meeqqat pornoliarineqarnerat pillugu suliami unnerluutigineqartut

Kalaallip inuusuttup meeqqat pornoliarineqarneri pillugit unnerluutigineqarnissani utaqqisariaqassavaa