assammik arsaanneq
Assammik arsaattartunut nunanut allanut sungiusaasoq ingerlaannaq atuutilertumik tunuarpoq
Niels Møller ukiuni arfineq-pingasuni assammik arsaannermi nunanut allanut sungiusaasuusimasoq, ingerlaannaq atuutilertumik tunuarpoq, Kalaallit Nunaanni Assammik Arsaattartut Kattuffia paasissutissiivoq
Kattuffiup nunanullu allanut unammisartunut sungiusaasusimasup isumaqatigiissutigisimasaat annertunersumik oqaaseqarfigerusunnagu, kattuffiup ilanngullugu paasissutissiaraa.
Niels Møller oqaatigaa, "Kattuffimmut nalunaarfigivara nuna tamakkerlugu sungiusaasuunermit kattuffimmi allatut atorfissaqartinneqaruma periarfissiissallunga suleqataanissamut".
Kalaallit Nunaanni Assammik Arsartartut Kattuffiani siulittaasoq Jørgen Isak Olsen oqaaseqarpoq:
- Siulersuisut Niels Møllerimik suleqatigiinnerminni ukiut arlaqartut matuma siorna anguniakkaminnik siunniussaminnik angusaqarsimapput. Suliniutit pitsaasut aallartisarneqarsimasut ingerlaqqissapput illerngit ingerlavissat allat siunertaralugit. Anguniagassatut siunnerfiit nutaat aallartinneqareerput. Anguniakkat ilaannut angutit nuna tamakkerlugu assammik arsartarnerannut siunissami suliniutinik aamma ilaqarput. Niels Møllerip piginnaasai siunissami allamut sammitillugit atorneqassapput tassungalu suleqatigiinnissatsinnut qilanaarpugut.
Niels Møllerillu aamma oqaatigaa:
- Ukiut arfineq-pingasut Kalaallit Nunaata angutit assammik arsartartuinut siuttooreerpunga. Isumaqarpunga ukiuni ingerlatsivigisanni ineriartorneq pitsaasumik ingerlasimasoq tassungalu ilanngullugu kattuffiup siulersuisuilu Kalaallit
Nunaanni assammik arsartarnerup ineriartornissaa siunertaralugu suliniutinik suleqatigiissuteqarsimalluta. Piffissanngorporlu illerngit ingerlaviinut nikisitsinissamut.