- Arctic Prime suliffinnik pilersitsivoq

Nunatsinni ingerlatseqatigiiffinni nalunaarsorneqarsimasuni Arctic Prime Fisheries, avaleraasartoortassiissutinik pissarsinngitsoortutuaavoq.

Tamatumalu maanna Kommune Kujalleq aalisarnermut piniarnermut naalakkersuisumut, Karl-Kristian Krusemut (S) ammasumik allagaqartippaa.

100 millionilikkaanik aningaasaliisimasoq
Arctic Prime Fisheries Qaqortumi Nanortalimmilu tunisassiorfinni suliffeqarfinnik pilersitsisoq, allakkami borgmesterimit Kiista P.Isaksenimit (S), borgmesterip sinniisaannit Simon Simonsenimit (S) aamma Henrik Brummerstedtimit kiisalu Bentiaraq Ottosenimit (A) atsiorneqartumi pingaartinneqarpoq.

- Arctic Prime Fisheries ingerlatseqatigiiffik 100 millionilikkaanik aningaasaliissuteqarsimasoq, kisiartaalluni pimoorussilluni Kommune Kujallermi pitsanngorsaaqqillunilu suliffissaqartitsinermik ujartuisimavoq, tassa kommunitsinni tunisassiorfinnut aamma atortunut aningaasaliilluni, allakkami tamanna allaqqavoq.

Saarullinniummut akiliisussaagaluartoq
Ingerlatseqatigiiffiup saarullinniarnermi angallat ningittagarsuut pisariaqartumik taarserneqartariaqartoq akilerniarlugu avaleraasartoorniarnissamut qinnuteqarsimagaluarpoq. Saarulliit taakku Qaqortumi Nanortalimmilu tunisassiorfinni tunisassiarineqartussat.

- Tamannalu ajornartorsiut suli aaqqiiffigineqanngilaq, tamatumunnga aningaasaliinissamut ajornartorsiummut allatut aaqqiissutissanik aamma ujartuisoqarpoq, kommunimi politikerit sisamat allapput.

Immap naqqani aalisakkanut pisassiissut
Ukiormanna avaleraasartoorniarnissamut tunngatillugu iliuuseqartoqarsinnaanngitsoq nassuerutigaat. Ningittagarsuut nutaaq pisiarineqarsinnaaniassammat, Arctic Prime Fisheriesip saarullittassinneqarnissaanut kisianni kajumissaaripput.

- Immap naqqani aalisakkanut pisassiissutit 4.000 tonsit Arctic Prime Fisheriesimut piaartumik salliutinneqarnissaat Kommune Kujalliup neriuutigaa. Qaqortumi septembarip aallaqqaataa 2017 tikitsinnagu ningittagarsuuteqalernissamut periarfissaqalernissaq pillugu akissutisinissaq pisariaqarmat, tamatuma tuaviuunneqarnera inussiarnersumik maluginiarsiuk, allakkami allaqqavoq.

Islandimiut piginnittut
Arctic Prime Fisheries Qaqortumi nalunaarsorneqarsimagaluartoq, ingerlatseqatigiiffik Islandimiunit pigineqarpoq, pisortaq aamma siulersuisut Islandimeersuupput. Kisianni tamanna aalajangiisuusariaqanngikkaluarpoq, kommunimi politikerit isumaqarput.

- Suliffeqarfiit kalaallinit pigineqartut Naalakkersuisut salliutikkusukkaat paasisinnaavarput, kisianni aamma ingerlatseqatigiiffiit kalaallinut iluaqutaasut Naalakkersuisut salliutittariaqaraat kissaatigaarput, taakku allapput.

- Taamaammat ingerlatseqatigiiffiit aalisarnermik aallutaqartut nunami tunisassiornissamik kissaateqartut Naalakkersuisut salliuttariaqariaqaraat isumaqarpugut, taamaalilluni suliffissarsiortunut suliffissanik periarfissanik pilersitsisoqarsinnaavoq, aningaasaqarnikkut ingerlatsisoqarluni kiisalu isumaginninnikkut unammilligassat aaqqiiviginissaannut kommuninut akileraarnikkut tunngavissaqalerluni.

Nassuiaatitaqanngitsoq
Arctic Prime Fisheries sooq avaleraasartoorniaqataassannginnersoq, Karl-Kristian Krusep (S) naalakkersuinikkut aalajangiinini manna tikillugu akissuteqarfigerusunngilaa. Kisianni nunamit allaneersunit pigineqarneranut apeqqummut tunnganera kommunip isumaqarnera ersarippoq.

Arctic Prime Fisheriesip piginnittut Kommune Kujallermi najugalinnik amerliniarlugit sulissutigigaa, tamatumunnga tunngatillugu oqaatigaat.

Aamma atuaruk: Avaleraasartoorniarnissamut akuersissummut itigartitsineq nassuiaatitaqanngitsoq