Ulluni pingasuni ujakkaarnissaq piareerpoq

Sisimiuni Nalunnguarfiup Tasia saneqqukkaanni Arctic Circle Racemi aallarfissaq takunngitsoorneqarsinnaanngilaq. Illoqarfimmi tikeraat sisoraatilisartut aamma takussaapput.

Arctic Circle Racemut siorna peqataasut 168-upput, ukioq mannali peqataasussat amerleriarsimallutik 181-upput.

Arctic Circle Racemi siulittaasoq naapertorlugu peqataasut ukioq manna amerlaneruneranut peqqutaasinnaavoq peqataasimasut misigisaannut immikkuullarissumut kammalaataasut misileerusulersimanerat.

Ikiuuttut 190-it

Arctic Circle Racep piviusunngortinnissaanut 190-it nammineq kajumissutsuminnik ikiuupput:

- Ukioq manna nammineq kajumissutsiminnik ikiuuttut 190-upput, kisianni 200-ut pisariaqartippagut. Angumerisassarpassuupput, qujanartumik naammassisassat naammassineqartarput. Kisianni suli ikiuussinnaasunik pisariaqartitsivugut, siulittaasoq Jens Klaus Lennert oqarpoq.

Sila atoruminassasoq

Sisorarlutik ujakkaarlutik aallaraangamik kiagulersarput. Arpannerlu tallimanngorpat marsip ulluisa 23-anni ullaakkut aallartippat, sapaatip akunnerisa naanerani sila kiannerulaalissaaq.

- Weekendimi kiannerulaassaaq, sila plussi angungajallugu kissasuseqassammat. Pissangagivarput apummut qanoq sunniuteqassanersoq, siulittaasoq Jens Klaus Lennert oqarpoq.

Arctic Circle Racemut peqataaniaraanni 100 kilometerisut imaluunniit 160 kilometerisut isorartutigisumut ujakkaarluni sisorarnissamut peqataanissaq periarfissaavoq. Tamannalu pissaaq tallimanngornermiit sapaat ilanngullugu.