Mianersoqqussut
Takornariat marluk Arctic Circle Trailimi annaanneqartut
Arctic Circle Trail siullerpaamik pisuffigisariaqanngilat - ingammik ukiukkut. Naak aqqut taanna inuit attaveqatigiittarfiitigut takullugu nuannerpasissinnaagaluartoq, pisuttartut tamarmik takisuunut pisunnermik misilittagaqartariaqartut, Lisa Germany, Arctic Circle Trailimi ataqatigiissaarisuusoq kaammattuivoq.
Annonse
Takornariat marluk Sisimiuniit Kangerlussuarmut pisullutik aallaraluarput. Ullulli pingasut ingerlaareerlutik sapaatip akunnerata naanerani Sisimiunut uternissaminnut ikiorneqartariaqarsimapput, nakorsamiit ikiorserneqarnissaat pisariaqarsimammat.
Lisa Germany naapertorlugu pisuttut taakku qerussorsimapput Sisimiunukaanneqartariaqarsimallutillu.
Arctic Circle Trail aallarterlaanut naleqqutinngilaq
Arctic Circle Trail ukiuni kingullerni nunaniit allaneersuniit ornigarneqaleraluttuinnarpoq. Ilaatigut sisoraatinik, apusiutinik, sikkilinillu ingerlaarfigineqartarluni. Soqutigineqaleraluttuinnarpoq. Taama Lisa Germany oqaluttuarpoq. Aqqulli taanna aallarterlaanut naleqqutinngilaq:
- Aqqut taanna siullerpaamik pisuffigineqartariaqanngilaq, ingammik ukiukkut. Taamaaliorniaraanni pissutsinut sakkortusinnaasunut atortut eqqortut pigineqartariaqarput.
- Pitsaalluinnassagaluarpoq aasakkut ukiukkullu pisunniartut pisunnginnerminni piginnaasatik misilittakkatillu nalilersoqqaarsinnaasarunikkit. Arctic Circle Trail inuit attaveqatigiittarfiisigut takullugu nuannerunarsinnaagaluartoq, pisuttussat tamarmik takisuunut pisunnermik misilittagaqartariaqarput. Tassani GPS, nunap assinga kompassiluunniit atorlugit sumiissusersisinnaasariaqarput kiisalu ikiueqqaarnermut ilisimasaqarlutik.
Inuit ajunnginnersut qulakkiikkit
Inuit marluk nunanit allaneersut innuttaasuniit naapinneqarput ikiorneqarlutillu. Lisa Germanyp innuttaasut kaammattorpai inuit aqqutaaniittut ajunnginnersut takulaartaqqullugit.
- Inuit naapitatit ajunnginnersut takukkit, ingammik tikeraajorpasippata. Paasiniarsinnaavatit ajunnginnersut, qeruttoorsimasimanermillu takussutissaqarpata ikiorlugit, Lisa Germany Arctic Circle Trailimi nakkutilliisoq oqarpoq.
Inuit nunanit allaneersut pisunnissamik eqqarsaateqartut takisuumut pisunneq misilittagaqarfiginngikkunikku misilittagaqarlualernissaminnut utaqqeqquai.
- Arctic Circle Trail tammarnavianngilaq - eqqortumik misilittagaqaleruit aggersinnaavutit pinngortitarlu nuannersoq misigalugu. Tamanna illit nammineq isumannaatsuunissat pillugu erseqqissarparput.
Arctic Circle Trail nittartagaqarpoq, tassani isumannaallisaanermut tunngasut atuarneqarsinnaallutik.
