OOQATTAASARNEQ
Norgemi pissartanngorniunnermi Slettemark ujaminnappoq
Sisoraatinik ooqattaasarluni unammisartoq Sondre Slettemark Norgemi pissartanngorniunnerni marlunnik ujaminnappoq.
Sapaatip-akunnerata naanerani Norgemi inuusuttut (20-22-nik ukiullit) pissartanngorniunneranni Tromsømi ingerlanneqartumi Sondre Slettemark peqataavoq.
Tassani tupaallannartumik 20 kilometerimut sisamariarluni ooqattaasarluni arpannermi bronzennappoq. Ilaatigut Norgemi inuussutissarsiutigalugu timersoqatigiiffinneersut, Norgemilu nunanut allanut unammisartut katillugit 62-it peqataaffigisaanni bronzennappoq, Kalaallit Nunaanni Biathlonertartut Kattuffiat ilisimatitsivoq.
- Sondre sisoraatinik oqilaniunnermi sukkanerpaat qulit akornanniilluni normu 3-nngorpoq. Taanna unammisunit marlunnit ukiumik ataatsimik marlunnillu angajulliusunit kisimi qaangerneqarpoq! Taakku marluk ooqattaasagassat 20-t eqqorsimavaat. Qaammatilli ataatsip matuma siorna inuusuttut nunarsuarmi pissartanngorniunneranni Norgemiut arpattartut pingasut ajugaasut Sondrep ajugaaffigai, kattuffik allappoq.
Stafetimi sølvinnattoq
- Arpannera nuanneqaaq! Piffissami kingullermi angalakulallungalu unammisaqattaaraluarlunga piukkunnarsigaluttuinnaavippasippunga, Sondre Slettemark oqarpoq.
Aamma stafet-imi sølvinnappoq:
- Aatsaat taama nuannertigisumik arpappunga. Apimmat pissutsit ilungersunarput. Nikorfalluni ooqattaasagassaq takujuminaappoq, tupinnartuliornikkulli tamaasa eqqorpakka.
- Norge ooqattaasarnermi sisoraatinik oqilaniunnermi siuttuulluinnartoq nalunagu, aammalu World Cupimi IBU Cupimilu ataatsimut isigalugit inissisimaffinnut tallimanut siullernut inissittuaannarnerat eqqarsaatigalugu Norgemi pissartanngorniunnerni sølvinnanneq nuannerluinnarpoq, Sondre Slettemark oqarpoq.