Arctic Circle Race aallartiinnaqaaq
Arctic Circle Race nunanit assigiinngitsunit 14-eersut inuit 181-it peqataasoralugit aallartiinnaqaaq. Arpartussat nalunaaqutaq qulinngunngilaartoq aallarnissaminnut piareersimalluinnarneranni Sisimiuni isiginnaartut 10-miit 0-mut kisitsipput.
Annonse
Sisimiuni qulisimalaarluni seqinnilillattaasoq silalu 17-it missaani issittoq arpattussat isiginnaartullu Nalunnguarfiup Tasiani pissangalluinnarput.
Erfalasut assigiinngitsut 14-it silaannarmi erfalapput, isiginnaartullu aamma erfalasulisarput.
Arctic Circle Racemi siulittaasoq Jens Klaus Lennert Qeqqata Kommunianilu borgmesteri Malik Berthelsen ingerlalluaqqusillutik oqalugialaareersullu isiginnaartut 10-mit 0-mut kisitsipput.
Kalaallit Nunaata pinngortitaa kusanaqisoq aqqutigissallugu arpattussat 181-it ulluni pingasuni ingerlaartussaanertik taamaalillutik aallartiinnaqaat. Tassani piginnaasatik pisinnaassusertillu misilerartussaassavaat.
Peqataasuni 181-ini ilisarisimaneqarluartoq Uiloq Slettemark panialu Ukaleq Slettemark peqataapput.
Noqartartut tapersersorniarlugit peqataasut
Peqataasorpassuit akornanni ilaapput qaratsamut tunngatillugu ilisimatooq kiisalu noqartartumut anaanaasoq, tassani noqartarneq nunarsuarmi ilisimaneqarnerulernissaa anguniarlugu arpaqataapput.
Trine Toft, qarasaq pillugu ilisimatooq aamma Stine Lincoln, noqartartumik paneqartoq DR-ip nangeqattaartuliaani Slædepatruljenimi peqataanikuupput.
Arpattut akornanni nammineq kajumissutsiminnik ikiuuttut 200-ut missaaniipput, taakkua arpattut ajunngitsumik ingerlaveqarnissaat qulakkeertussaassavaat.
