ASSAMMIK ARSARNEQ
Anders Friis nunanut allanut unammisartunut sungiusaasuujunnaarpoq
Kattuffimmi sipaarniarneq pillugu Anders Friis aamma Kim Ostermann Petersen nunanut allanut unammisartut sungiusaasuattut, aammalu nunanut allanut unammisartunut sungiusaasumut ikiortitut ingerlaannaq atuutilersumik tunuartinneqarput.
Arnat assammik arsartartut 2023-mi VM-imut peqataanerat pissutigalugu Kalaallit Nunaanni Assammik Arsartartut Kattuffiat aningaasatigut eqqugaangaatsiarpoq. Maanna kattuffik sukannersumik aalajangerpoq, tassa Anders Friis aamma Kim Ostermann Petersen nunanut allanut unammisartut sungiusaasuattut, aammalu nunanut allanut unammisartunut sungiusaasumut ikiortitut ingerlaannaq atuutilersumik tunuartinneqarput.
Taama kattuffik TAAK tusagassiuutinut nalunaarummi allappoq.
- Tamanna angorusunnanngeqaaq, aningaasaqarnerli innarlernagu ineriartortitsinissaq qulakkeerniarlugu pisariaqavissimavoq. Siulersuisuni pisoq uteqattaarparput. Nunanut allanut unammisartuutivut unitsissanerlugit, imaluunniit angutit nunanut allanut unammisartut nunarsuatsinni pissartanngorniuunnissamut anngunniunneq unitsissanerlugu eqqartuivugut. Taamatuttaaq U18 angutit nunanut allanut unammisartut unitsissanerlugit, kiisalu U18 arnat nunarsuatsinni pissartanngorniuunnissaat unitsissanerlugu eqqartuivugut, kisianni timersortarnissaat qulakkeerniarlutigu isumaqatigiippugut, taama oqarpoq TAAK-ip siulittaasua Carsten Olsen.
Arnat nunanut allanut unammisartui eqqugaapput
Nunanut allanut unammisartunut sungiusaasup sungiusaasullu ikiortaata tunuartinneqarnerat Kalaallit Nunaanni assammik arsartartut siunissaat qulakkeerniarlugu iliuuseqarnerusoq, TAAK-ip siulittaasuata erseqqissarpaa. Naak siorna arnat nunanut allanut unammisartuinik VM-imut anngutitsigaluartut, nunanut allanut unammisartut allat kattuffiup aningaasatigut ajornartorsiorneranit aniguisinniarlugit tunuartinneqartariaqarput.
Timersornerup pitsaanerpaap politikkikkut tapersersorneqannginnera pillugu taamaaliortariaqarsimallutik TAAK-ip ilisimatitsissutigaa.
- Arnani angutinilu anguniagaqarusussuseqarpugut. Nunarsuatsinni pissartanngorniuteqataarusuppugut, periutsittali qimerloornissaat pisariaqarpoq. Unammisartuutivut qanillinerusariaqarpavut, nunarsuatsinnilu pissartanngorniuunnissanuinnaanngitsoq, aammali akeqqatta unammillerluarnissaannut unammisarnissaannik aammalumi ajugaaffisarnissaannik piumasaqaateqarnitsinnik paasitillugit.
Assammik arsarnermi anguniakkat annertuut
Angutit nunanut allanut unammisartut pillugit siunissaq ungasinnerusoq pillugu Johannes Groth pilersaarusioreersoq, inuusuttunilu U18 angutit nunanut allanut unammisartut sungiusaasuat Angutimmarik Kreutzmann peqatigalugu siunissami angutini nunanut allanut unammisartuutinnisaannut piorsaassasoq, TAAK ilisimatitsivoq.
Arnat eqqarsaatigalugit Victoria Budek Svendsen-ip U18 arnat nunanut allanut unammisartut nunarsuatsinni pissartanngorniuunnerani peqataassaaq, taamaasillunilu arnat inersimasut nunanut allanut unammisartuni nikikkiaartornissamut sulissuteqassalluni.
Arnat nunanut allanut unammisartut siuarsarlugit Anders Friis aamma Kim O. Petersen suliniuteqangaarsimanerat, assammik arsartartut kattuffianni siulittaasup erseqqissarpaa:
- Piffissaq annertungaatsiartoq atorlugu arnat nunanut allanut unammisartut ineriartortippaat. Taakkununnga qujassutissaqaqaagut.
