Sauwestari Kodamik nersornaaserneqartoq

Sisimiuni kulturip illorsuani Taseralimmi arfininngormat unnukkut ukioq manna Koda Awards ingerlanneqarpoq.

Aallakaatitsineq KNR-ikkut toqqaannartumik aallakaatinneqarpoq, Dorthea Reimer-Johansen-ilu, ulluinnarni Sermitsiami tusagassiortoq, aallakaatitsinermi ingerlatitsisuuvoq.

Nuannaartorinnittunut qujasoq

Tusarnaartorpassuatik nuannaartorinnitserpassuatillu nipilersoqatigiit ilaatigut ima qutsavigaat:

- Piffissap sivikitsup iluani taama tusarnaartoqartiginerput qujamasuutigeqaarput, aamma qujarusuppunga Fabriziomut, saqqummersitsinerput piviusunngortissimammagu. Soorunami aamma Minik Hansen, taalliortoq, taanna aamma qujaffigerusupparput.

- Aamma nuuteeqqap suliarinerani peqataasut tamaasa, tulleertut aammalu sorpassuartigut suleqataasut tamaasa qujaffigerujussuarusuppakka. Aamma soorunami ilaquttagut uagutsinnut tapersersuisimasut qujaffigerujussuarusuppakka. Nunarsuarmi pinngortitani kusanarnerpaaq paarilluassavarput! Immitsinnut asassaagut immitsinnut paaraluta, ilaatigut Sauwestari taama qujassuteqarpoq.

Ukiumut nersornaat taalliortumut/erininniortumut pitsaanerpaamik saqqummersitsisimasumut tunniunneqartarpoq. Asanninnermut, avatangiisinik mianerinninnermut aamma Kalaallit Nunaata Danmarkillu attaveqatigiinnerannut nuuteeraq Sauwestari tunngavoq.

MUK Isumalluarnartumut nersornaatisivoq

Ukiumut Nersornaammut saqqummersitat pingasut innersuunneqarput: VARNA GL saqqummersitaq”Pilarngar” pillugu, Sauwestari saqqummersitaq ”Sauwestari” pillugu aamma Sound of the Damned Saqqummersitaq “Atornerlunnanga” pillugu. 

Ukiumut Nersornaatip saniatigut Isumalluarnartumut nersornaatisisoqartarpoq, taannalu MUK-imut, saqqummersitaq "Ingerlavunga"-mut tunniunneqarpoq.

Guitarertuat attortisimaqisoq nipilersoqatigiit sinnerlugit qutsaviginnippoq:

- Piviusunngortitseqataanerpaanut aamma qujarusuppugut, immiussisorput Jens-Jørgen Anthonsen, Pukuut. Mixerisorput masterisorpullu Hans-Peter Anthonsen, marluullusi qujanarujussuaq, piviusunngortitsinerpaavusi. Suleqatiginikuusimasagullu tamaasa, Maali maani aamma najuuppoq, allallu suleqataanikuusut. Naggataatigut tusarnaartartut sineriak tamaat tusarnaartartuususi, aamma ilissi uagutsinnut isumaqarnerpaavusi, qujanaq!