Nunaqqatitsinnut tarrarsortassaagut

FILM.GL-ip nuannaarutigaa kalaallit isiginnaartitsisartut amerliartuinnartut filmini inuttaasalernerat taamaalillutillu filmiliornermi takuneqarsinnaanerulermata.

Isiginnaartitsisartut Berda Larsen aamma Connie Kristoffersen filmimi ”Kalak”-mi pingaarutilittut inuttaasut ilagaat. Pinerluttulerinermi filmimi nangeqattaartumi ”True Detective”-mi ilaatigut amerlasuut akornanni Aka Niviâna Mørch Pedersen isiginnaartitseqataasut ilagaat. Aammattaaq filmi naatsuliaq ”Ivalu” Oscarinik agguaasunut siorna anngunnera puigussanngilarput. Tassani taamanikkut aqqanilinnik ukiulik Mila Heilmann Kreutzmann pingaarnertut inuttaavoq.

Tamanna isiginnaartitsisartunut aamma kalaallit inuusuttortaannut pitsaasuusoq, Klaus Georg Hansen, FILM.GL-imi siulittaasoq oqarpoq.

- Siullermik isiginnaartitsisartunut inuttut pingaaruteqarpoq. Ilisimaneqalertarput, immaqalu aamma nunanit allanit nittarsaassisoqalertarput. Allattorsimaffinnut assigiinngitsunut ilannguttarput, pingaarutilittullu inuttaanissamut annerusunut periarfissaat taamaalillutik annertunerulertarput, taanna oqarpoq.

FILM.GL tassaavoq kalaallit filmiliortartut soqutigisaqatigiit kattuffiat.

- Tamanna inuusuttunut maani peroriartortunut aamma pingaaruteqarpoq. Tulluusimaarutigissavaat. Tamanna pingaartorujussuuvoq. Clint Eastwood kinaluunniit tarrarsorfiginagit nammineq maligassiuilluarnerput tarrarsorfigissavarput, taanna oqarpoq.

Inuiattut nammineq filmiliatsinnut aallakaatitatsinnullu tarrarsornissamut periarfissaqarutta, ilutsinni nunasiaataajunnaarsarnitsinnut nukittortitseqataasinnaavoq, FILM.GL-imi siulittaasoq isumaqarpoq.

- Kalaallit filmiliaanni Kaassassuk imaluunniit Aqissiaq pingaarnertut inuttaasoq suli takunngilarput, aammalu kalaallit ataatsimut nammineq maligassiuisutsinnik oqaluttuartumik. Aammattaaq kalaallit filmiliaannik imaluunniit piviusulersaarummik Sassuma Arnaanik, Qaammatip Inuanik imaluunniit ataatsimut oqaluttuatoqqatsinnik tarrarsorfigisinnaasatsinnik aamma tulluusimaarutigisinnaasatsinnik suli saqqummertoqanngilaq, Klaus Georg Hansen nassuiaavoq.

Taamaattumik kalaallit filmiliortarnerat nukittorsassallugu pingaarutilerujussuuvoq.

Kattuffiup FILM.GL-ip filmiliornermik suliassaqarfiup inuussutissarsiut kulturikkut pilersuiffiusoq, politikkikkut paasineqarnissaanik anguniagaqarpoq. Pingaartumik politikerit kulturikkut pilersuiffittut inuussutissarsiutaaneranik paasisariaqarpaat, Klaus Georg Hansen oqarpoq.

- Filmiliorneq Kalaallit Nunaannut avammut tunisinermi isertitaqartitsisinnaasoq isumaqarpunga. Filmiliaatigut soorlu ”Qaqqat Alanngui” kaaviiaartitanik millioninik pilersitsisuunngillat. Filmit James Bond imaluunniit assingusut Kalaallit Nunaanni immiunneqartillugit Kalaallit Nunaannut annertuumik isertitaqartitsisinnaapput, taanna oqarpoq. 

Filminstitut

FILM.GL naapertorlugu Kalaallit Nunaanni filmiliat siullersaat 2009-mi saqqummerpoq, taamanerniilli ukiumut ataaseriarluni filmiliortoqartartoq missiliorneqarpoq.

Filminstitutimik kalaallit filmiliornerannut isumaginnissinnaasumik amigaateqartugut, Klaus Georg Hansen isumaqarpoq.

- Taavalu filmkommissæri nunanit allanit filmiliortunik nunatsinnut tikisitsisinnaasoq. Taamaaliorusullutik tulleriiaarput. Kisianni Kalaallit Nunaat pillugu immiussinissamut Islandimi imaluunniit nunani allani atugassarititaasut pitsaanerupput, taakkunani aningaasartuutit ilaat utertinneqarsinnaammata, aamma saaffiginnissutinut taamaattunut attaveqarfeqarlunilu sullissiveqarmat, taanna oqarpoq.

Kalaallit Nunaanni nunanit allanit filmiliortut takornariartitsisarnermik isigineqarsinnaapput, taanna nassuiaavoq.

- Assersuutigalugu ”Kalak”, immaqa iluatsilluartorujussuussaaq, inuillu immaqa Tasiilaq qanoq innersoq takorusulissavaat. Taamaalilluni filmit pillugit takornariarneq pissarsiarineqassaaq, tassa inuit sumiiffiit takuniarlugit angalasarnerat. Assersuutigalugu ”Ringenes Herre” New Zealandimi immiunneqarpoq, naak immiunneqarneranit ukiut 15-it qaangiukkaluartut, suli sumiiffiit taakku takuniarlugit takornariartorpassuaqartarpoq, Klaus Georg Hansen oqaluttuarpoq.