Filmiliaq qilaatersornerlu pillugu festivali: Kulturikkut suliniutinut 520.000 koruunit tapiissutigineqarput
Nunani Avannarlerni Piorsarsimassutsikkut Attaveqaat NAPA suliniutinut tallimanut immikkuullarittunut aningaasaliissalluni aalajangerpoq.
NAPA qinnuteqaatinik pitsaasunik amerlasuniik tigusivoq, tamanna nunatsinni nunanilu avannarlerni pimoorussinermut pinngorartitsinermilu pisuussuteqarnera uppernarsaataavoq.
Taamaattumik qinnuteqaatit pitsaasut taama amerlatigillutik NAPA-p siulersuisuisa suliniutit sorliit kulturikkut ineriartornermik, inuusuttut peqataanerannik issittormiulu sammiviliiffianik suliniuteqartoqartunit pitsaanerpaat toqqarnissaat ajornaatsuinnaasimanngilaq, NAPA-mit ilisimatitsissutigineqarpoq.
NAPA-p toqqarpaa suliniutit tallimat immikkut toqqakkatut tapersersussallugit, tassa attaveqaatip taassuma anguniagaanut, "kulturikkut paarlaasseqatigiittarnissamik, inuusuttut akuutinneqarnissaannik aammalu issittumi pissutsit qanoq innerinik ersersitsisuunissaannik" aallaavilimmik suliniutaammata"
Nutaaliorneq suleqatigiinnerlu annertusarneqassasut kissaataavoq
Elin á Rógvi, NAPA-mi siulersuisut siulittaasuat neriuuteqarpoq suliniutit taakku nunani avannarlerni nutaaliornissamut suleqatigiinnermullu kajumississutaajumaartut:
- Suliniutit taakku tapersersorsinnaanerivut tulluusimaarutigeqaarput. Taakku tamarmik immikkut Kalaallit Nunaanni nunanilu avannarlerni inuiaqatigiit kulturikkut ineriartornerannut tapersiiginnanngillat, aammali piujuartitsinermik, inuusuttunik peqataatitsinermik issittormiullu inuunermut paasinnittariaasiat takuneqarnissaanut siuarsaaqataapput. Neriuppugut suliniutit taakku nunani avannarlerni nutaaliornissamut suleqatigiinnermullu kajumississutaajumaartut, taanna oqarpoq.
Suliniutit aningaasaliiffiginerisigut tapersersorneqartut ukuupput:
- SIPINEQ+ – Naapitta – Issittumi nunat inoqqaavisa kulturikkut paarlaasseqatigiittarnissaannik pilersaarusiorneq. Kalaallit Nunaanni 2SLGBTQIA+ peqatigiiffik, Sipineq+ 100.000 koruuninik tapiiffigineqarpoq.
- Dansehallerne - Angalanera – qitinnermik naapitsineq kalaallit, savalimmiormiut, Ålandimiut qallunaallu meerartaannik peqataaffigineqartoq – 100.000 koruuninik tapiiffigineqarpoq.
- Plus Pictures – Atuarfik – Kalaallit Nunaanni meeqqat atuarfianni atuartut malinnaaffiginiarlugit filmiliornissamut suliniut 50.000 koruuninik tapiiffigineqarpoq.
- Katuaq – Katuarpalaaq - Kalaallit Nunaanni kulturikkut illorsuaq Nuummi qilaatersornermik festivalimik aaqqissuussissaaq. Katuaq 120.000 koruuninik tapiiffgineqarpoq.
- Arctic Sounds 2024-mi festivalertitsinernut, angalanernut immiussinermullu aningaasartuutigineqartunut, katillugit 150.000 koruuninik tapiiffigineqarumaarpoq.
Aammattaaq Nuuk International Film Festival 200.000 koruuninik tapiiffigineqarpoq festivalip 2023- mi ukiakkut NAPA-p Kulturimut Tapiisarfianut qinnuteqaateqarnerata kingorna, tassanilu siulersuisut isumaqatigiissutigaat upernaakkut qinnuteqaatit tunniunnissaannut piffissaliussaq sioqqullugu filmfestivali 200.000 koruuninik tapiiffigissallugu, NAPA-mit ilisimatitsissutigineqarpoq.