ASSIT
Assiliisartup Kalaallit Nunaanni qaammatisiutit pilerseqqippai
Assiliisartoq qallunaaq-kalaaleq 37-nik ukiulik Chris Christoffersen, qaammatisiutissamut pinngortitamik illoqarfinnillu assiliiniarluni ulluni makkunani Kalaallit Nunaanniippoq.
Assiliisartoq qallunaaq-kalaaleq Chris Christoffersen suliniuteqareersorlu Kalaallit Nunaanni qaammatisiut saqqummerseqqinneqarpoq.
Qaammatisiut assiliartalik Kalaallit Nunaanneersoq saqqummerseqqammerpaa, aappaagumullu qaammatisiutissaq pilersaarusiuleruttorlugu.
Kalaallit Nunaanni qaammatisiutinut assiliartalinnut Rolf Müller Jan Bøgstedilu Kalaallit Nunaat pillugu assinik ukiut qulikkuutaat ingerlaneranni assiliisarsimasut saqqummersitsissaarnikuupput. Qaammatisiummik pilersitsinissaminut assiliisartut taakku marluk isumassarsiorfigalugit, Chris Christoffersen ilisimatitsivoq.
- Meeraaninniit eqqaamasinnaasannik Kalaallit Nunaat pillugu qaammatisiutit angerlarsimaffitsinni iikkamiittuaannarsimapput, aammattaaq ilaquttannut juullimut tunissutigisarpakka, Chris Christoffersen oqaluttuarpoq.
Aappaagumut suliniuteqartoq
- Qaammatisiutinik assiliartalinnik nutaamik saqqummersitsinikkut oqartoqarsinnaagunarpoq pilerseqqikkiga, Chris Christophersen oqarpoq, taassumalu anaanaminit ilaqutai Maniitsumeersuupput.
2025-mut qaammatisiummut assilissanik nutaanik assiliiniarluni Chris Christophersen maannakkorpiaq Kalaallit Nunaanni angalavoq. Ulluni makkunani Ilulissat, Aasiaat, Sisimiut aamma Nuuk aqqusaartorpai.
Nittartakkami matumani Kalaallit Nunaata qaammatisiutaa pillugu paasissutissat amerlanerusut atuarsinnaavatit.
