Arnarulunnguaq eqqaassuserneqassaaq atuakkiarineqarlunilu
Ilisimasassarsiornerup naammassineraniit ukiut 100-t qaangiunneranni Arnarulunnguaq eqqaassuserneqassaaq. Arnarulunnguaq Knud Rasmussen Qaavigarsuaq Miterlu peqatigalugit tallimassaanik Thulemiit ilisimasassarsiornermi, Nunatsinniit, Canadap issittortaa aqqusaarlugu, Alaskap avannamut kimmut isorpiaanut, ukiuni 1921-imiit 1924-mut ilisimasassarsioqataavoq. Eqqaassutissarlu napparneqassaaq.
Ilisimasassarsiornerup naammassineraniit ukiut 100-t qaangiunneranni Arnarulunnguup
eqqaassuserneqarnissaanut aningaasanik katersineq maanna naammassisimalerpoq.
Eqqaassutissaq eqqqumiitsuliortup Aka Høeghip suliarissavaa, tassani qiperuisartoq Thomas K. Andersen ikiortigalugu suliarissavaa.
Itsarnisarsiuup Pauline Knudsenip Arnarulunnguaq pillugu atuakkiussaaq.
- Eqqaassutissap uleerneqarnissaa atuakkallu saqqummersinneqarnissaa pissaaq
ilisimasassarsiornerup naammassineranit ukiut 100-nngorneri eqqorlugit, tassa 22. september 2024-mi. Ulloq taanna pingaartinneqassaaq Arnarulunnguarlu persuarsiorluta
nalliuttorsiutigissavarput. Asii Chemnitz Narup Sermitsiaq.AG-mut oqarpoq.
Isumassarsiamiit piviusunngortitsineq
Ilisimasassarsiorneq 1921-imi septembarip arfineq-aappaanni aallartippoq, tassanilu 18.000 kilometerit sinnerlugit isorartutigisoq qimussinik ingerlaarfigineqartussaalluni. Qimussinik angalaneq sakkortooq Arnarulunnguup peqataalluarnerani naammassisinnaasimasoq oqaluttuarineqartarpoq.
Arnarulunnguaq angutit atisaat mersorlugillu pisarsimavai saniatigullu aamma nerisassat pingaaruteqaqisut 50-inik issitsigisumi anorersuarmilu isumagisarlugit.
Arnarulunnguup iliuuserisimasai Asii Chemnitz Naruppip assut eqqarsaatigisarsimavai.
- Isumassarsiaq uanninngaanneerpoq, eqqarsaatigisarakku Knud Rasmussenip angalanini iluatsissimanavianngikkaluaraa Arnarulunnguaq angalaqataasimanngitsuuppat, angutitulli napariarsorluni angalaqataasarpoq.
- "Qimusserujussuarnermi’"Arnarulunnguup suliarujussuata tamanut takusassiarineqarnissaa pingaaruteqartuuvoq, aamma oqaluttuarisaanitsinni arnartaqarnitta puiorneqannginnissaa taama pingaartigaluni. Arnarulunnguaq peqataasimanngitsuuppat qimusserujussuarneq Knud Rasmussenimut taama iluatsissimatiginaviarunanngikkaluarpoq.
Arnat akuerineqarlutillu nersorneqartariaqarput
Illoqarfinni nunaqarfinniluunniit angalaaraanni eqqaassutissat angutaanerusut takussaasarput. Asii Chemnitz Narup isumaqarpoq arnat nersorneqartarnissaat aamma ersarinnerusariaqartoq. Tassani inuiaqatigiinnut oqaluttuarisaanermullu qanoq sunniuteqarsimanerat eqqaassutissiinermi ersarissarneqartassallutik.
- Kulturikkut oqaluttuarisaanitta, inuit anersaakkut inuusaasitoqaannit atortuinillu katersat naliitsorsuit ilisimasassarsiornermi tassani katersorneqarput. Taamaattumik pissusissamisoorluinnarpoq Arnarulunnguup eqqaassuserneqarnissaa, ataqqillugulu tulluusimaarutiginninnerput takutinniarlugu qujaffigissavarput.
Peqatigiiffik Arnarulunnguaq-mi siulersuisut tassaapput Asii Chemnitz Narup siuttorarlugu, Tukummeq Qaavigaq, Karo Thomsen Fleischer, Mille Søvndahl Pedersen, Aviâja Lyberth Lennert, Jens Danielsen kiisalu Aqqaluk Lynge.
Arnarulunnguaq 37-iinnarnik ukioqarluni toqukkut qimagupput, taannalu qatanngutigiinni sisamaasuni nukarlersaavoq.