QEQQA
2024-mi umimmaat 2018-imisulli amerlatigipput
Kangerlussuup eqqaani umimmaat 2018-imiilli amerlassusaat allanngorsimanngitsut, Pinngortitaleriffiup kisitsisaataasa kingulliit takutippaat. Ukiut arfinillit matuma siornatulli umimmaat amerlatigisut Kangerlussuarmi, Maniitsumi Sisimiunilu kisitsinerup takutippaa.
Sumiiffinni umimmaat qassiunerinik kisitsiniarluni qulimiguulik Kangerlussuup, Maniitsup Sisimiullu qulaani timmisimavoq.
Kisitsinermi periuseq "isorartuumit immikkoortiterineq“ atorneqarsimavoq, taannalu 2018-imi aamma atorneqarsimavoq.
Misissuinerup inernera naapertorlugu 2024-mi umimmaat 2018-imisut amerlatigipput.
-Kisitsinerup inernerigallagai malillugit umimmaat kingullermik 2018-imi kisinneqarnermisulli amerlatigipput, Pinngortitaleriffik tusagassiuutinut nalunaarummi allappoq.
Umimmaat 1.600-nit amerlanerusut assilineqartut
Umimmaat 2018-imi aammalu 2024-imi amerlaqatigiipput, umimmaalli nunami siaruaassimanerat assigiinngissuseqarpoq. Kisitsineq 2018-imi marsimi ukiuunerani piniartoqareernerata kingorna ingerlanneqarpoq, angallatinillu motorilinnik akorngusersorneqarsimanerisa kingunerinik umimmaat amerlanerpaartaat taamani 700 meterinik qatsissutigisuniipput.
Piniartoqannginneratali allanillu akorngusersuisoqannginnerup nalaani 2024-imi kisitsineq ingerlanneqarpoq, taamaattumillu umimmaat nalinginnaasumik pukkinnerusuni sumiiffigisartakkaminniinneranni kisitsisoqarpoq. Umimmaallu arnavissat ilumioqarnerisa naajartornerata nalaanni qooqquni pukkitsoqarfinnilu nererusaarsinnaasuugaluarpata, taava piaqqat amerlanerulernissaannik tamanna kinguneqassagaluarpoq:
- Umimmaat piarai 10%-inik ikinnerussappata motorilinnik piniartoqarsinnaanissaanut sukaterisoqartariaqartoq Pinngortitaleriffik innersuussereerpoq (siuliini kisitsinerni umimmaat piarai 10%-inik ikinnerusut naammattoorneqanngisaannarsimapput). Aqutsivimmi kujallermi piaqqat 6-8%-inik amerlassuseqarput, aqutsivimmi avannarlermi piaqqat 13-17%-inik amerlassuseqartut.
Angutivissat naatsorsuutigisamit amerlanerusut
Pinngortitaleriffik naapertorlugu angutivissat piniarfimmi avannarlermi kujallermilu ilisimagisamit amerlanerusut, piniarfimmilu kujallermi piaqqat ikittunnguusut, umimmaat aaqqissuussaanerisa takutippaat.
- Kujallermi umimmaqarnera peqqippasikkaluarluni taamaattoq ukiuni marlunni-pingasuni piaqqat taamatut ikitsigiinnassappata, taava umimmaat ikiliartortussaassapput. Kangerlussuulli avannaani umimmaat amerliartortutut isikkoqarput.