Soraarnerussutisiaqarnissamut aaqqissuussinermut SISA ingerlatsisuussaaq

Sulinermik Inuussutissarsiuteqartut Soraarnerussutisiaqalernissamut Aningaasaateqarfiat, SISA, soraarnerussutisiaqarnissamut aaqqissuussinermut pinngitsoorani ilaanissamut tunngatillugu neqerooruteqartitsinermi pilersitsinissamut aamma allaffissornermik sullissinissamut toqqarneqarpoq.

Danmarks Nationalbank

Sorlannguaq Petersen

pingasunn 08. agg 2018 16:33

Annonce

Ingerlatsinissamut isumaqatigiissut ukiuni qulini ingerlassaaq sivitsorneqarnissaa periarfissaalluni. SISA tusagssiuutinut nalunaarummi taama ilisimatitsivoq.

- Nuannaarutigaarput Namminersorlutik Oqartussat soraarnerussutisiaqarnissamut aaqqissuussinermut pinngitsoorani ilaanissamik SISA ingerlatsisussatut tatigalugu toqqarsimammassuk, SISA-mi pisortaq Søren Schock Petersen, taama oqarpoq.

SISA pillugu

SISA ilaasortaminit pigineqarpoq taamaattumillu aktiaatilinnut sinneqartoorutinik tunniussisussaanngilaq. Oqariartuut tassaavoq Nunatsinni kattuffinnut aamma suliffeqarfinnut soraarnerus- sutisiaqalernissamut aaqqissuussinernik orniginartunik tunniussinissaq, sapinngisa- mik pitsaanerpaamik iluanaaruteqarluni aamma nalornisoorfiusinnaasut sapinngisa- mik appasissuutillugit.

• 31. decembari 2017 killiffigalugu soraarnerussutisiaqalernissamut ileqqaakkat katillugit 3.135,8 mio. koruunit.

• Akileeqataassutit 2017-imi akilerneqartut 210,2 mio. koruunit.

• Ilaasortamut ataatsimut 2017-imi aningaasartuutit 387 koruunit.

• Kalaallit Nunaanni suliffeqarfiit 200 sinnerlugit sulisumik soraarnerussutisiaqa- lernissannut SISA-mut akiliisarput.

• Soraarninngorsimasunut 800-nut 2017-imi 32,4 mio. koruunit tunniunneqarput

Akileraartarnermut Aqutsisoqarfik akiliisitsisassaaq

Akileraartarnermut Aqutsisoqarfik soraarnerussutisiaqarnissamut aaqqissuussinermut pinngitsoorani ilaanissamut akileeqataassutinik, inunnik soraarnerussutisiaqalernissamut naammattumik akiliisanngitsunik akiliisitsisassaaq.

- Taamaattumik ilaasortat amerlanerpaat namminneq imaluunniit suliffitsik aqqutigalugu soraarnerussutisiaqalernissamut ullumikkut SISA-mut akiliisartut soraarnerussutisiaqarnissamut aaqqissuussinermut pinngitsoorani ilaanissamut akileeqataassutinik akilersuitinneqassanngillat, soraarnerussutisiaqalernissamut aningaasaateqarfik ilisimatitsivoq.

Minnerpaamik 4 procentit

Ukioq 2018-imi soraarnerussutisiaqarnissamut aaqqissuussinermut pinngitsoorani ilaanissamut akiliisinneqarnianngikkaanni minnerpaamik isertitat 4 procentii akilerneqarsimassapput. Akiligassat siulliit 2019-ip naalernerani akileqquneqassapput, tassa Akileraartarnermut Aqutsisoqarfiup 2018-imut nammineerluni immersukkat misissoreerpatigit.

Soraarnerussutisiaqarnissamut aaqqissuussinermut pinngitsoorani ilaanissamut akiliutigineqartut piffissaq nallerpat SISA-mit tunniunneqartalissapput inuunerup sinnerani soraarnerussutisiatut. Soraarninngornissamut ukioritinneqartut suli angunagit toqusoqarpat taava katersukkat qimagaasunut tunniunneqassapput.

Minnerpaamik ukiut qulit

Soraarninngornissamut ukioritinneqartut angugaanni kiisalu tigusisarneq aallartissimalluni, taava qanoq pisoqaraluarpalluunniit sivikinnerpaamik ukiuni qulinik soraarnerussutisianik pisagaqartoqassaaq, aammattaaq soraarninngornerup kingornatigut ukiut qulit suli qaangiutinngitsut toqugaanni.

- Soraarnerussutisiaqarnissamut aaqqissuussinermut pinngitsoorani ilaanissaq SISA-p aaqqissuussinerinut kattuffinnut aamma suliffeqarfinnut neqeroorutigisaanut assut tulluarput. Taamaattumillu SISA pisinnaalluarpoq soraarnerussutisiaqalernissamut aaqqissuussinermik aqutsissalluni, ilaartortatsinnut neqeroorutigisatsitut appasissumik aningaasartuutitalimmik, Søren Schock Petersen oqarpoq

inuiagatigiit nunatsinnit