Simonsen: Kiffartuussinissamut isumaqatigiissutit atorunnaarsinneqarsinnaanngillat

Disko Linemut kiffartuussinissamut isumaqatigiissutit annertuumik taarsiiffigeqqaartinnagit imaasiallaannaq atorunnaarsinneqarsinnaanngillat

Attaveqaqatigiinnermut Naalakkersuisup Simon Simonsenip IA-minngaanneersumut Sofia Geislerimut paragraf 37 naapertorlugu akissuteqaataani taama allassimasoqarpoq.

Sumiginnaaneq

Diskolinemut isumaqatigiissut pisuni immikkut ittuni isumaqatigiissut annertuumik
sumiginnarneqarsimappat, ullut 30-it piffissamut killiliussat iluanni
iluarsineqarsinnaanngitsunik, isumaqatigiissuteqarnermut tunngavigisat annertuunik allannguuteqarneranni imaluunniit force majeure, isumaqatigiissut atorunnaarsinneqarsinnaavoq, Simon Simonsen paasissutissiivoq.

Ilanngullugu paasissutissiaraa, Naalakkersuisut kiffartuussinissamut isumaqatigiissutaasutit 31. december 2020 tungaanut atuuttussatut atsiorneqarsimasut atorunnaarsinneqarnissaannik pilersaaruteqanngitsut.

Allatut pilersaaruteqartoqanngitsoq

- Naalakkersuisut maannakkut kiffartuunneqarnissamut isumaqatigiissutit atorunnaarsinnissaat pilersaarutiginngimmassuk, allatut pilersaarutinik suliaqartoqanngilaq, Simon Simonsen akissuteqaammini allappoq.

Juunip qaammataani suleqatigiissitaliaq pilersinneqarpoq, atorfilittanit, Air Greenland-imit aamma Disko Line-mit peqataaffigineqartoq. Suleqatigiissitap maannakkut periaatsip pitsanngorsarneqarnissaanut siunnersuuteqarnissaq suliassaraa.

Angallanneq pillugu isumasioqatigiinneq

Ilanngullugu oqaatigaa, Inatsisartunut ilaasortat tamarmik oktobarip qaammataani attaveqaqatigiinneq pillugu isumasioqatigiinnissamut aggersarneqassasut. Tassani 1. januar 2021 aallarnerfigalugu kiffartuussinissamut isumaqatigiissutigineqartussanik suliaqarnissap aallartinnissaa siunertarineqassaaq.

Powered by Labrador CMS