Savimminilerinermik Ilinniarfimmik nutaamik piareersaasoqartoq
Ullut arlaqanngitsut qaangiuppata Sisimiuni Savinilernermik Ilinniarfimmik nutaamik sanaartornissaq pilersaarusiorneqassaaq, taanna kukkunersiorfimmit BDO-mit 140 millioner koruunit missarluinnaani akeqarnissaa ilimagineqarpoq.
Ilinniartitaanermut Naalakkersuisoq Vivian Motzfeldt, taama paasissutissiivoq, aningaasaliissuteqartarnermilu piginnaatitsissutit pisariaqartut pissarsiarineqaqqaartariaqarnerat sillimaffigaa.
Anguniagassatut pilersaarusiaq
Nuummi ilinniarfiup ukiut pingasut tallimalluunniit atasinnaasutut nalilerneqarsimanera qaangiutsinnagu, Sisimiuni nutaamik Savimminilerinermik Ilinniarfimmik sanasoqarnissaa pilersaarutigineqarpoq.
Paasissutissat Demokraatimeersumut Randi Vestergaard Evaldsenimut paragraf 37 naapertorlugu akissuteqaammi allassimapput.
Tassani aamma allassimavoq, Niuernermut Ilinniarfik ukiuni qulini atasinnaasutut nalilerneqarsimasumut tunngatillugu Nuummi illumik nutaamik sanaartornissaq Naalakkersuisut maannakkut pilersaarutiginngikkaat.
Campus naammassilertoq
- Akerlianik Campus Kujalliup aamma TNI-mi ilinniarnernik kiisalu Sullissinermi Økonom-itut ilinniarnermik ingerlanneqartup maannakkut allilerneqarpoq. Alliniinerup taassuma novembarip qiteqqunnerani naammasinissaa ilimagineqarpoq, Vivian Motzfeldt akissuteqaammini paasissutissiivoq.
Campus Kujalleq Qaqortumiittup, illuni inuussutissarsiutinut ilinniarnernut, GUX ingerlaqqillunilu sivikitsumik ilinniarnernut atorneqartup, iluarsaanneqarneranut allilerneqarneranullu katillugu 104,4 millioner koruuninik akeqarsimavoq.