Sara Olsvig: Naalagaaffeqatigiinneq pillugu oqallinneq sumumiinerusariaqarpoq
Inuit Ataqatigiit isumaat erseqqippoq. Naalagaaffeqatigiinneq attatiinnarneqassanngilaq. Kalaallilli Nunaata Danmarkillu akornanni pissutsit ataavartumik ineriartortinneqassapput, IA-mi siulittaasoq Sermitsiami isumaliutersuuteqarpoq
Namminiilivinnissaq pillugu oqallinnermi Inuit Ataqatigiit annertuumik isornartorsiorneqarput piffissami kingullermi.
Qinersinissap tungaanut ilaatigut IA danskit erfalasuannik assitaliunneqarput, kiisalu Aaja Chemnitz Larsenip Naalagaaffeqatigiinnerup attanneqarnissaa ineriartortinneqarnissaalu aamma isornartorsiorneqaatigalugu.
Atorunnaarsinnissaanut ineriartortitsineq
Kalaallit Nunaata namminiilivinnissaa IA-mit anguniarneqartoq siulittaasumit Sara Olsvigimit maanna naqissuserneqarpoq.
- Naalagaaffeqatigiinneq atorunnaarsikkumallugu ineriartortittariaqarparput, Sermitsiami isumaliutersuummi Sara Olsvig allappoq.
Kalaallit Nunaata ingammik aatsitassat aqqutigalugit aammali inuussutissarsiutinik ingerlatanit allanit aningaasaqarnikkut ineriartornissaa, taamaalillunilu naalagaaffimmit tapiissutinit isumalluutaarunnissaa namminersorneq pillugu isumaqatigiissummi siunertarineqartunut IA-mut toqqammaviuvoq.
Isumalluuteqarunnaarnissaq
Aatsitassat inuussutissarsiornikkullu periarfissat aqqutigalugit Danmarkimit tapiissutit isumalluutigineqarunnaarnissaat tassani anguniarneqarpoq.
- Kalaallit Nunaanni ataatsimoorussamik suliniut, aammali Kalaallit Nunaata Danmarkillu akornanni ataatsimoorussamik suliniut. Isumaqatigiissutinimmi isumaqatigiissuteqarneq marluk arlaqarnerusulluunniit akornanni pisarpoq, namminersornerlu pillugu isumaqatigiissuut Kalaallit Nunaata Danmarkillu akornanni isumaqatigiissutaavoq, Sara Olsvig allappoq.
Sukumiinerusumik oqallinnissaq
Naalagaaffeqatigiinnerup oqallisigineqarnera sukumiinerulertariaqartoq isumaqarpoq.
- Massakkut saqitsaassutaasut assersuutitut tigulaariartigit. Kiinamiut aningaasaliisartut sulianilluunniit ingerlatsisut mittarfiliortiternernut suliniutitsinnut akuussappat? Slotshomimi naaggaarput, namminersorlutilli oqartussat illorsuani angerput. Illuatungeriit tamarmik oqaatigisaminnik aalajangiusimannipput. Piviusulli annertunerusunik imaqarput, Sara Olsvig oqarpoq.
Taamaattumik Naalagaaffeqatigiinneq nutarterneqartariaqartoq isumaqarpoq.
Sara Olsvigip isumaliutersuutaa tamakkiisumik aviisimi Sermitsiami atuarneqarsinnaavoq: