Sara Olsvig: Atsioqatigiinneq quianaannarpoq

Isumaqatigiissutip nassatarisaanik aningaasaliissutigeqqitassat 1,1 milliard koruunit suli nassaariniartussanngussasut Inuit Ataqatigiinnit sillimaffigeqquneqarpoq

Mittarfiit pillugit isumaqatigiissut soqutiginarpoq kisianni ersarlungaatsiarpoq, IA-mi siulittaasoq Sara Olsvig naliliivoq.

- Isumaqatigiissutaasussat toqqammavigineqartussallu tigussaasumik isumaqatigiissuteqarfigineqarsimanngillat. Isumaqatigiissutaasimasup taamatut aaqqissuunneqarsimanerata kingunerisaanik isumaqatigiissutaasoq ersernerluinnarani naammaassisimarpasinngitsutut isikkoqarpoq. Suliap inernera takusimareerlugu atsioqatigiinneq ippassaq pisoq piviusutut iliuuseqavinnertut taajuminaappoq, tusagassiutinut nalunaarummi allappoq.

Tassami isumaqatigiissummi suliassat arlaqartut Naalakkersuisoqarfimmit danskillu aningaasaqarnermut naalakkersuisuanit isumaqatiginninniutigineqartussaapput. Air Greenlandimut piginnittussaaneq tassani aamma isumaqatiginninniutigineqartussaavoq.

Tamakku pissutaallutik isumaqatigiissut tuaviunneqarsimasariaqanngikkaluartoq Sara Olsvig isumaqarpoq.

- Sulineq peqqissaarunneqanngiivissimavoq nukingernerujussuullu kingunerisaanik Inatsisartut Aningaasaqarnermut Ataatsimiititaliaaluunniit isumaqatigiissutip imarisaanik ilisimatinneqanngilaq, peqqissaarussimagaannilu atsioqatigiinneq sioqqullugu ilisimatitsisussaagaluarneq pinngimmat pisoq piviusumik iliuuseqavinnginnertut isigaarput Kim Kielsen-illu iliuusissaarutivissimaneranik ersersitsisuulluni, oqarpoq.

1,1 milliard koruunit
- Naalagaaffik Kalaallit Airports A/S-imut 700 million koruuninik aningaasaliissuteqassappat, taava uagut nammineerluta suliffeqarfiup 2/3-ia pigiinnassagutsigu nammineq 1,4 milliard koruuniinik aningaasaliisariaqaleqqavugut. Ulloq manna tikillugu nunatta karsia suliffeqarfimmut 300 million koruuningajaat aningaasaliissutigineqareerput, isumaqatigiissutillu nassatarisaanik aningaasaliissutigeqqitassat 1,1 milliard koruunit suli nassaariniartussanngussasut.

- Qungujulaarutissaqanngitsuunngilagulli, siunnerfeqaqatigiissutaasumimi Inuit Ataqatigiit politikkianut naapertuuttumik anguniagaqartoqarnera takusinnaagatsigu.

- Kina tikilernerarlugu suaartaannarani Danmarki nunatsinni aningaasaliisussanngorumalernera ukiorpassuarni politikkikkut Inuit Ataqatigiit allat ilagalugit oqariartuuteqartuarsimanerup inerneraa. Ersarissumillu anguniagarisimasatta Airgreenland-imik tamakkiisumik Namminersorlutik Oqartussat piginnittuulernissaa piviusunngorsinnaanngorportaaq, Sara Olsvig oqarpoq.

Powered by Labrador CMS