Royal Greenlandimut suliartortitat angerlaannartut

Royal Greenlandip illoqarfinniit nunaqarfinniillu suliartortitaat 100-jut ulapaarfik suli naammassinngitsoq angerlaannarput, tamanna Royal Greenlandip tunisassiorfiini ingerlatsiniarnermut ajalusoortitserujussuarpoq.

Sulisoqarnermi siunnersortaaneq Søren Olsen Damgaard Royal Greenlandiminngaanneersoq tassaanngaannartumik sulisussaaleqilerneq pillugu ingerlatseqatigiiffiup nittartagaa naapertorlugu oqaatigaa.

Taassuma paasissutissiaraa, suliartortitat affaat angerlarsimasut tamannalu namminersorlutik oqartussat ingerlatseqatigiiffiutaata ingerlatsiniarneranut ajalusoorujussuartitsivoq.

Angerlarserneq atornerluinermillu ajornartorsiuteqarneq

- Ulapaarfimmi suliartortitat amerlasuut sulinermik sungiussisimanngitsuusut erserpoq. Arlallit sivisuumik suliffeqanngitsuusimakkajuttuupput. Ilai angerlarsertarput allallu imigassamik assigisaannilluunniit atornerluinermik ajornartorsiuteqarput, Søren Olsen Damgaard oqarpoq.

2018-imi ulapaarfimmi sulisut nunatsinneersut katillugit 100-ngajaapput, Kinameersut 18-iupput, Filippinerineersut qulingiluaapput Nordjobbimeersullu 24-iullutik.

- Suliartortitat affaasa missaat naak angerlarlutik aallaraluartut suliartortitat nunanit kangilliineersut sulisullu aalajangersimasut aalajaatsut nunatsinneersullu aalisartut aalisagartaminnik qalerualittaminnillu ataavartumik tunisisarnerminnik attassiinnarsinnaasimanerannut qularnanngitsumik iluaqutaapput, Royal Greelandip nittartagaani taama paasissutissiisoqarpoq.

Powered by Labrador CMS