Olsvig: Mittarfiit pillugit saqqummiussinerput ima tunngaveqarpoq
Politikkikkut eqqissiviilliortoqarnera pissutaalluni Inuit Ataqatigiit mittarfiliortiternissanut isumartik saqqummiukkaat Sara Olsvig oqarpoq
Inuit Ataqatigiit mittarfiit pillugit saqqummiussaat ima qulequtaqarpoq: 'Angallannikkut allannguisariaqarpugut – isumatusaarnerusumik periuseqarnissamut siunnersuusiaq'.
- Landskarsimit aningaasarpassuit eqqartorneqarmata ataqatigiissumik pilersaarusiortoqarnissaa pisariaqarpoq, partiip Katuami tusagassiortunik katersortitsinermini Sara Olsvig oqarpoq.
Danmarkip aningaasaliinissaa tikilluaqquaa, piumasaqaatigineqartulli tamaasa paaseqqaartinnagit isumaqatigiissummut akuersisoqannginnissaa pisariaqartippaa.
Aningaasat kaaviiaartitat amerlavallaalernerisigut akit aqunneqarsinnaanngitsumik qaffariataarsinnaanissaat partiip kissaatiginngilaa, taamaattumik mittarfiliornerit ataasiakkaarlugit sananeqartariaqartut isumaqarput. Aningaasaqarnermut Siunnersuisooqatigiit aamma tamanna pitsaanerussasoq siunnersuutigineqareerpoq.
- Nunami suliffeqarfiit mittarfiliornissamut peqataatinneqarnissaat kissaatigilluinnarparput, partiip siulittaasua oqarpoq.
Ilulissani mittarfiup takissusissaa pillugu partii nutaamik siunnersuuteqarpoq.
Illoqarfiup ineriartortinneqarnissaanut piffissaqarluartariaqartoq oqariartuutigineqarpoq. Akunnittarfinni takornariat tamaasa inissaqartinnissaat anguneqartariaqartoq ilaatigut tunngaviliisoqarpoq.
- Piumasaraarput Kommune Qeqertalik Avannaatalu Kommunia takornariaqartitsinikkut inuussutissarsiornikkullu ataqatigiissakkamik ineriartortitsissasut, partiimit oqaatigineqarpoq.
Taamaattoq Ilulissani talittarfiup pitsaanerulernissaanut suliniartoqalernissaq anguniarlugu sulissuteqartoqartariaqalersoq oqariartuutigineqarpoq. Kiisalu illoqarfimmi 2200 meterimik mittarfeqalernissaq pisariaqartinneqalerpat mittarfiup takissutaa tallineqarumaartoq oqariartuutigalugu.
Qaqortumi piffissaq eqqorlugu angallannerit pitsaanerpaaffimmiitinneqarnissaa anguneqartariaqartoq IA isummerpoq.
Qaqortoq mittarfittaassasoq Sara Olsvig naqissusiivoq - tamanna qaqagu pissanersoq oqaatigiumanngilaa. Namminersorlutik Oqartussanit tamanna aningaasalerneqassasoq siunnersuutigaa.
Sukkanerpaaq atorlugu Nuummi mittarfiup tallineqarnissaa sulissutigineqartariaqartoq Sara Olsvig tusagassiortunik katersortitsinermi oqarpoq.
Sinneqartoorfiulluartussaammat tamanna anguneqapallattariaqartoq oqaatigalugu.
- Nunatta Nuuk siuariartorluartoq pisariaqartippaa, ilaatigut oqarpoq.
Illoqarfinni minnerni ujaraaqqanik qallikkanik mittarfiliornissanut piareersarnerit nangittariaqartut, IA saqqummiinermini ilannguppaa:
- Illoqarfiit pisavut tassaapput Qasigiannguit, Qeqertarsuaq, Kangaatsiaq, Narsaq, Nanortalik, Ittoqqortoormiillu. Tasiilami mittarfittaarnissamik misissueqqaarnerit aamma nangikkumavagut.