Nunap sisoornera nutaaq: Qimagutitinneqarsimasut utersinnaanerat neriuutigineqalerpoq

Illorsuarmiut qimagutitinneqarsimasut nunaqarfimminnut uteqqissinnaanissaannut periarfissaqalersimannguatsiarpoq. Nunap sisoornerata nutaap qanittukkut pisimassangatinneqartup tassaarsuaqaqqissinnaanermik aarlerinartorsiorneq minnerulersissimarpasippaa.

Ajunaarnersuarmik eqqugaasimasumi Uummannap nunaqarfittaasa ilaanni Nuugaatsiami Kommunefogedi, Mikkel Jeremiassen Gabriel Møller peqatigalugu natserniarlutik karrat kangerluani angalaarput.

Mikkel-ip Gabriel-illu tupaallaatigisaminnik nuannaajallaatigisaminnillu takuaat, pinngortitap nammineerluni qaqqaq sisooriaannaasimasoq sisoortereersimagaa ulorianarunnaartillugu.

- Qaqqami nuna sisooriaannaq nungungajaavissimavoq, millisimangaarmallu sinneruttorluunniit sisuussagaluarpat tassaarsuaqarnissaa ilimanarunnaarluinnarsimavoq, Mikkel Jeremiassen isumalluaammersimaqaluni Sermitsiaq.AG-mut oqaluttuarpoq.

Illorsuit ammarneqaqqissinnaalerpa?

Mikkel Jeremiassen isumaqarpoq ulorianartorsiortitsineq pinngortitap nammineerluni qaangiutitissimagaa, taamaammallu maanna misissuisoqartariaqartoq, 17. juni 2017-imi ajunaarnersuaqarneranut atatillugu nunaqarfik ilanngullugu matuneqarsimasoq Illorsuit ammarneqaqqissinnaanersoq. Illorsuit Nuugaatsiammiit kujammut kimmut 35 km-eritut ungasitsigisumiippoq.

- Illorsuarmiut arlalissuupput nunaminnut angerlaqqikkusuttut, angerlaqqinnissaminnut periarfissinneqassagunik. Tassami nunaqarfik Illorsuit Nuugaatsiamisut aseruatiternermik ajunaarnersuarmillu toqqaannartumik eqqugaanikuunngilaq, taamaattorli nunap sisoorsinnaaneranut tassaarsuaqaqqissinnaaneranullu aarlerinartorsiorneq pissutaalluni oqartussanit toqqarneqarsimavoq matuneqassasoq.

Kommunefogedi tassunga tunngatillugu kaammattuuteqarpoq Nunatsinni upalungaarsimanermut ataatsimiititaliaq qaqqaq pillugu nutaamik nalilersuisitsisariaqartoq.

Ilisimatuut nalilersuilik

Paasisaminnut nutaanut atatillugu Mikkel Jeremiassen maanna upalungaarsimanermut ataatsimiititaliamut kaammattuuteqarpoq qaqqap sisooriaannartallip qanoq issusia nutaamik misissorneqartariaqartoq nalilersorneqarlunilu.
- Soorunami ilisimatuut tusarnaassavagut innersuussutaallu malillugit, taamaattorli nammineq isinnik sumiiffiup qanoq issusianik takunnereerlunga, qularutiginngilara ilisimatuut nutaamik, uanga naliliininnut qanittumik naliliissasut, taamaammanuna GEUS (Nunatsinni Danmarkimilu nunap qanoq issusianik misissuisarfik, aaqq.) aamma upalungaarsimanermut ataatsimiititaliaq kaammattorikka piaartumik nalilersuinernik saqqummiussaqaqqullugit. Tassami iluassagaluaqaaq Illorsuit ammaqqineqarsinnaasuuppata innuttaasullu uterusuttut uternissaminnut periarfissinneqarsinnaasuuppata, tassami nunap immikkoortua taanna aalisarnermut piniarnermullu periarfissarissaartuugami innuttaasut inuussutissarsiumminnik aallussileqqinnissaminnut periarfissinneqassagaluarmata, Mikkel Jeremiassen naggasiivoq.

Karrat kangerluanni pissutsit nutaat pillugit upalungaarsimanermut ataatsimiititaliaq oqaaseqartissallugu suli iluatsinngilarput.

Powered by Labrador CMS