Misiliineq: Nannut ajoqutaasut igilluni qimagutsinneqassapput
Siriusip qimussimik alapernaarsuisuisa misilittagaat maanna misiliinermut ilaatinneqalissapput, nannunut qanillattortunut ajoqutaasarnerannut Naalakkersuisut iluarsiissutiginiarpaat.
Illuinnarsuutinik kalerrisaarutinik paassaannalinnik misiliinissaq akuersissutigineqassasoq, piniarnermut naalakkersuisoq, Erik Jensen ilisimatitsivoq. Siriusip qimussimik alapernaarsuisuisa aamma nunat allat nanoqarfiusut illuinnarsuutit taama ittut pitsaasumik misilittagaqarfigaat.
Ittoqqotoormiit
- Ittoqqortoormiini tamatuma misilinneqarnissaa pilersaarusiorneqarpoq, atortullu taakku tulluartuuppata periarfissap tamatuma sumiiffinnut allanut siaruaannissaat Naalakkersuisut sulissutigissanerlugu nalilerniarpaat, Erik Jensen, paragraf 37 naapertorlugu Sofia Geislerip (IA) nannut ajornartorsiutaanerat qanoq iluarsiivigineqarnissaanut apeqqutaanut taama akissuteqarluni allappoq.
Ingammik Ittoqqortoormiini nannut ajornartorsiutaapput, taakku najugaqarfinnut qanillattorlutik najugaqartunut navianartorsiortitsisarput.
Eqqissisimatitsineq
Nannut piniarneqartarnerisa sivitsorneqarnissaanik Naalakkersuisut oqaluuserissutigisimanngikkaat, Erik Jensen aamma ilisimatitsivoq.
- Nannunik illersuineq piniarnerlu pillugit nalunaarummik nutaamik Naalakkersuisut siunissami qaninnerpaami isummertussaapput. Tassani eqqissisimatitsinerup allanngortinneqamissaa pilersaarutaanngilaq, tassa aggustip aallaqqaataaniit septembarip 31-ianut, piffissarlu taanna pingaarutilimmik neriniarfiusarmat aammalu ukioq taanna piaqqiat eqqissisimaarlutik alliartussammata, piniarnermut naalakkersuisoq ilisimatitsivoq.