MIO: Meeqqat ima killilertassavat
Meeqqat Pisinnaatitaaffiinut Sullissiviata atuagassiaani nutaami angajoqqaat meeqqaminnik qanoq killiliisinnaanerat ukkatarineqarpoq.
Atuagaq ’Meeqqanik perorsaanermi killiliisarneq - Sooq killiliisoqartarpa – kiisalu killissat sumiippat?’ saqqummersinneqaqqammerpoq, atuakkiaq meeqqanut siunnersortimit Ellen Bang Bourup-imit aamma psykologimit Amalia Lynge Pedersen-imit atuakkiorneqarpoq.
Isumassarsiorneq
Meeqqat Illersuisuat Aviâja Egede Lynge tusagassiuutinut nalunaarummi paasissutissiaraa, Kalaallit Nunaanni najugaqarfinni assigiinngitsuni angalareerluni atuakkap saqqummersinneqarnissaa isumassarsiorfigisimallugu.
Sinaakkutit pillugit angajoqqaat arlallit apeqquteqartarsimapput, meeqqallu arlallit aamma killilerneqarnissaminnik ujartuisarsimallutik, Aviâja Egede Lynge oqarpoq.
Pisussaaffik
Meeqqat pisinnaatitaaffii ima paasineqassapput,
meeqqat atugarissaartinnissaannut inersimasut pisussaatitaasut. Pisinnaatitaaffiittaaq ima aamma
paasineqassapput, inersimasut meeqqanik illersuissasut, meeqqallu toqqissisimasutut atugarissaartutullu misigissasut. Meeqqat pisinnaatitaaffeqarnerat isumaqanngilaq, meeqqat sunut tamanut
sunniuteqartussaanerannik, kisiannili inersimasut meeqqat isumaannik tusarnaartassasut killiliisassasullu, MIO-p tusagassiuutinut nalunaarutaani allassimavoq.
MIO, Royal Arctic Line-mut, quppersagannguamik saqqummersitsinissamut
nassiussuinissamullu aningaasaliillunilu tapersersuisimasumut, immikkut qujaniarpoq.