Meeqqat atornerlugaasimasut angalallutik katsorsaasartunit katsorsarneqartassasut

Kommuneqarfik Sermersooq Kalaallit Nunaanni Isumaginninnermi Aqutsisoqarfik suleqatigalugu angalallutik katsorsaajartortartunik pilersitsivoq, taakku meeqqanik inuusuttunillu atornerlunneqarnermik kinguneranik tarnimikkut atugarliuuteqartunik katsorsaasassapput, Kommuneqarfik Sermersooq tusagassiutinut nalunaarummi allappoq.

Angalallutik katsorsaajartortartussat tassaapput avataanit katsorsaasartut qaammatit tamaasa sapaatit akunnera ataaseq Tasiilamiittartussat. Tasiilami meeqqat inuusuttullu atornerlunneqarsimasut 6-init 17-inut ukiullit tapersersorlugillu katsorsartassavaat, aammali ulluinnarni meeqqanut attuumassutillit angajoqqaat sulisullu tapersersortassallugit. Tamatuma saniatigut angalallutik katsorsaajartortartut aamma meeqqanut angajoqqaanullu ammasumik siunnersuisassapput, kiisalu sulisunut meeqqanik inuusuttunillu sullissisunut pikkorissaasallutik.

Namminersorlutik Oqartussat suleqatigalugit suliniut taanna aallartinneqarnera kommunalbestyrelsemi ilaasortap Uju Petersenip nuannaarutigaa.

- Angalallutik katsorsaasartut taama suliaqarnissaat pillugu annertoorujussuarmik pisariaqartitsisoqarnera qularutissaanngilaq. Tasiilami taama sulisoqarnissaanik annertuumik pisariaqartitsisoqarpoq. Soorunami illoqarfimmi katsorsaasartunik atorfinitsitsinissarput sulissutigaarput, kisianni maanna suliniut illoqarfimmi suliniutinut ilapittuutaavoq pitsaalluinnartoq, tusagassiutinut nalunaarummi oqarpoq.

Angalallutik katsorsaasartut suliniutaannik nangitsinissaq qulakkeerniarlugu suleqatigiinnik pilersitsisoqassaaq, taannalu atuarfimmit, peqqinnissaqarfimmit, politiinit, Meeqqanut Ilaqutariinnullu Ingerlatsivimmit aamma Tasiilami Ilaqutariinnut Sullissivimmit inuttalerneqassaaq.

Kommuneqarfik Sermersuup aamma Kalaallit Nunaanni Isumaginninnermi Aqutsisoqarfiup angalallutik katsorsaasartunut aningaasartuutit tamaasa matussusertassavaat. Suliniut siullermik misiliutitut ingerlanneqassaaq, juuni 2019-imilu naliliiffigineqarumaarpoq.