KNI unamminartoqaraluarluni angusarissaarluarpoq
Suliffeqarfiup suleqatigisaa Pitsaasut akiliisinnaajunnaarnerat 20 million koruuninik naleqarpoq
Senobis peqatigalugu KNI-p Pitsaasut piginneqataaffigaa, taannalu ukioq manna akiliisinnaajunnaarluni matuvoq.
Akiliisinnaajunnaaraluartoq KNI 2017-mi missingersuutini angusarissaarluarpoq, tassami 103 million koruuninik sinneqartoorami.
Nioqqutissanik pilersuineq 66 million koruuninik sinneqartoorfiuvoq, ukiup siuliani sinneqartoorutit 38 million koruuniusimallutik.
- Angusarissaarnerunermut ilaatigut pissutaapput kaaviiaartitaqarneruneq, aningaasartuutikillisaaneq aningaasartuutinillu aqutsilluarneq, kiisalu nioqqutissanik pingaarutilinnik akikilliliisimaneq, KNI tusagassiutinut nalunaaruteqarpoq.
Ikummatissanik pilersuinermi ingerlatsivik Polaroil 54 million koruuninik sinneqartoorfiuvoq, ukiup siuliani 65 million koruuninik sinneqartoorfiusimalluni. Ukiumi naatsorsuuteqarfiusumi ikummatissap akia liiterimut katillugu 65 øre-mik appartinneqarsimavoq.
Angusarissaarnissaq pingaaruteqarsimasoq KNI-mi pisortaanerup Peter Grønvold Samuelsenip oqaatigaa, tassami illut atorneqartut aserfallatsaalineqarnissamut pisariaqartitsipput.
Ukiumi naatsorsuuteqarfiusumi 2017/18-mi KNI-mi sulisut akileraarutaat 75 million koruunit pisortat karsiinut utertippaat, kiisalu selskabsskat 25 million koruunit akilerlugit.
KNI ukiumi naatsorsuuteqarfiusumi 2017/18-p naanerani 934-nik sulisoqarpoq. Ulloq naallugu suliffinngortissagaanni 760-it KNI-mi sulisorneqarlutik. Taamaalilluni KNI Kalaallit Nunaanni suliassqartitsinerpaat akornanniippoq.