Kielsen akerliussutsimik takutitsisut kamaqisut pillugit: Misigissutsikkut attortinnarpoq
Naalakkersuisut siulittaasuata Kim Kielsenip Hans Egedep illuata silataani ataasinngornermi pissusilersuutaat akuersaanngilaa. Kim Kielsen qisuaariaateqarpoq Demokraatit siulittaasuata Niels Thomsenip akuersaarani aamma nalunaarnerata kingorna
Kim Kielsen pakatsisimavoq Partii Naleraq ataasinngornermi akerliussutsimik takutitsinermi aaqqissuisutut inuit asissuillutik aallartimmata qisuariaateqanngimmata. Pissutsit taamaasineranni qisuariannginneq asissuinermut akuersaaginnarnertut paasisariaqartoq oqarpoq.
Akerliussutsimik takutitsisut puffassimaartut Kim Kielsenip annoraani piissagaa suaartarput kalaalliunnginneraramikku. Pissutsit najummassimanarsipput Kim Kielsen aamma statsminister Lars Løkke Rasmussen Hans Egedep illuaniit animmata mittarfissualiassanut milliard sinnerlugu aningaasaliisoqarnissaa atsioqatigiissutigereerlugu.
- Akerliussutsimik takutitsinermi ilaatigut annoraara peeqqullugu suaartarneqarpunga, tassagooq kalaaliunnginnama. Aamma allaat kaammattuisoqaraluarpoq politiinngooq najuuttut ikeqimmata ujaqqanik milloorneqassasunga. Aallaallumi nivinngagaanissannik oqaluttoqaraluarpoq. Uannut pissusilersuutigineqartut saniatigut ministeriuneq angerlaqqullugu suaartarneqarpoq, Kim Kielsen Facebookimi quppernermini allappoq nangillunilu:
- Soorunami kalaaliulluni allaat annoraaq peeqqullugu suaartarneqarluni misigissutsikkut attortinnarpoq. Annerinerpaasarali tassaavoq meeqqaat isiginnaartoralugit tusarnaartoralugillu pissusilersuutit taama ittut saqqummiunneqarmata, Kim Kielsen oqarpoq.
Erseqqissarpaa kikkut tamat oqartussaaqataanerat tunngavigalugu akerliussutsimik takutitsinissamut pisinnaatitaaffik ataqqilluinnarlugu, taamaattorli akerliussutsimik takutitsisut pissusilersuutaat akuersaanngilluinnarpaa.
Partii Naleraq akerliussutsimik takutitsinermik aaqqissuisuuvoq.
- Partii naleqqap aaqqissugaanik akerliussutsimik takutitsisut annoraara peqquullugu suaartalermata, aamma politiinngooq ikeqimmata ujaqqanik milloorneqarnissara kaammattuutigineqalermat akerliussutsimik takutitsinermik aaqqissuisut qisuarianngillat – tamanna suaartaatigineqartunik akuersaarnertut isigisariaqarpara!, Kim Kielsen oqarpoq. Akerliussutsimik takutitsisinnaaneq illersorpaa taamaattorli akerliussutsimik takutitsisoqarnerani nakkarsaaneq atornagu ataqqeqatigiinneq tunngavigalugu isummanik nittarsaasoqartassasoq kaammattuutigalugu.
Akerliussutsimik takutitsisut pissusilersuutaat Demokraatit siulittaasuata Niels Thomsenip akuersaanngilaa aammalu neriuutigalugu imminermisulli Partii Naleqqap siulittaasua Hans Enoksen pissusilersuutigineqartunut pakatsisimatigissasoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...