Kangerlussuarmi pujortoq: Timmisartumik angallassineq unittooqqasoq
Nunatsinni timmisartuussinissat amerlanerpaartaat ullumikkut taamaatiinnarneqarput. Tamanna ilaatigut Kangerlussuarmi aamma Kitaata sineriaani pujorneranik pissuteqarpoq.
Air Greenlandip nittartagaanut alakkarterilluni angallassinermut pilersaarutit takugaanni, sinerissami timmisartuussinissat tamangajammik ‘taamaatippoq’-mik nalunaarsorneqarsimapput. Tamanna ilaatigut Kangerlussuarmi aamma Nuummi pujorneranik pissuteqarpoq.
- Pujornerata ullumikkut ilaasut tamaasa sunniiffigai, tassa nunatta iluani aamma nunanut allanut ilaasussat. Tassani Københavnimut aamma Keflavikimut ilaasut 246 aamma nunatsinni angalasut 200-t missaanniittut pineqarput, Air Greenlandip attaveqaqatigiinnermut immikkoortoqarfia Sermitsiaq.AG-mut naatsumik taama nalunaaruteqarpoq.
Angalanissamut pilersaarut inissinneqariarpat atuisut angalanissaat allanngortinneqassasoq ilisimatitsissutigineqarpoq, taakkulu mailikkut, sms-ikkut imaluunniit sianerfigineqarlutik nalunaarfigineqassapput.