Inuusuttuaraq arsaatillaqqissoq Asii Danmarkimi unammisartunngorpoq
14-nik ukiulik Asii Kleist Berthelsen Danmarkimut nuulerpoq. Danmarkimi pissartani Fortuna Hjørringimi unammisartunngussaaq
Asii Kleist Berthelsen tallimanngorpat Danmarkimut nuulerpoq, Fortuna Hjørringip U16-ni unammisartuini unammisartunngulerluni.
Asii Kleist Berthelsen GSS peqatigalugit Nunatsinni pissartanngoqataavoq, ajugaaniutivinnermi unamminermi pingasoraarluni. GSS sisamariarluni unamminerani Asii Kleist Berthelsen 27-nik isertitsivoq.
- Unammisaqattaarnerni isertitsinerpaajorusullunga 'Årets Hold'-imilu ilaarusullunga GM-eriarpunga. GM-imi unammilluaqattaarpunga, pissartanngoqataasinnaaneralu nuannaarutigaara, Asii Kleist Berthelsen Sermitsiaq.AG-mut oqarpoq.
Asiip arsaq nakkartinnaveersaaraa takuuk. GM-ertoqannginnerani suliffeqarfimmit GSS aningaasaliiffigineqarpoq, Asiip arsaq nakkartinnaveersaarmagu
Jyllandip avannaanut tassa aqagu tallimanngornermi nuuttussanngorpoq.
- Danmarkimut nuunnissara ajornaatsuinnaassanngilaq, kisianni unammisaqattaartarnissanut arsaatillaqqissullu akornanni sungiusaqateqartalernissara qilanaarisorujussuuara, oqaluttuarpoq.
Angajoqqaavi, Ivalu Kleist aamma Tønnes 'Kaka' Berthelsen, Asii Kleist Berthelsenip Danmarkimut arsaattartunngorniarluni nuunnissaa naatsorsuutigereersimavaat.
- Maannakkulli Danmarkimut nuunnera siusippallaalaarsoraarput. Anaanaalluni tamanna artornalaarpoq, kisianni piumassuseqartorujussuuvoq, anguniakkanilu angussaqqaarai qularinngilara, Ivalu Kleist oqarpoq.
Ataataata Tønnes 'Kaka' Berthelsenip suli Nuummi najugaqarallarnissaa kissaatigisimagaluarpaa.
- Kisianni timersuumminut aallusisorujussuuvoq, Danmarkimilu ineriartornissaminut periarfissagissaarneruvoq. Ineriartorsinnaanera maani killeqarpoq. Nuunnissaminut aalajangernera akueraarput, tanngassimaarutigeqaarpullu. Immikkut ittumik piumasaqarfiginikuunagulu sungiusarnikuunngilarput. Ineriartornera malunnartumik sukkasoorujussuunikuuvoq, ataataa Tønnes 'Kaka' Berthelsen oqaluttuarpoq.
- Ikinngutiminit timersornikkut siuarsimanerunera maluginiartareerparput, taamaattumik Danmarkimut maanna nuulernera tupaallaataanngilaq, Ivalu Kleist oqarpoq.
Misiliutigalugu Fortuna Hjørrinngimi sungiusaqataavoq maajimi.
- Ulluni tallimani sungiusaqataavunga, tassani periarfissaasinnaasut takuakka. Aamma tassani atuassaanga, Asii Kleist Beethelsen oqarpoq.