Immiorfik pisiniarfinnut immiaaqqanik tunisassiornerminik unitsitsivoq
Godthåb Bryghus marsip aallaqqaataani imigassamut inatsip atuutilersinneqarnerata kingorna sulisunik pingasunik soraarsitsisimavoq. Tamatuma saniatigut pisiniarfinnut immiaaqqanik tunisassiorneq unitsinneqarluni.
Qanittumi Godthåb Bryghusip immiaaraliaanik pisiniarfinni pisisoqarsinnaajunnaassaaq.
Immiorfiup nunani allani nioqqutissiortut allat soorlu Carlsberg aamma Tuborg unammillersinnaajunnaarlugit Brugsenimut tunisassiornerminik unitsitsivoq.
Immiorfiup pisiniarfinni immiaaqqat tuniniagai nunguppata nutaanik taarserneqassanngillat.
Ajusaarnartoq
Imigassamut inatsit eqqunneqarnerata kingorna kalaallit immiorfiinut tunisassianik pilerisaaruteqarsinnaanerat inerteqqutaalerpoq. Tamanna tunisat ikileriaateqangaatsiarnerinut pissuteqarpoq malitsingisaanillu aalajangersimasumik sulisut pingasut soraarsinneqartariaqalersimallutik.
- Soorunami ajusaarnaqaaq. Nunanilu allani immiorfiit pilerisaaruteqarsinnaanerat unammillersinnaajunnaarpagut, Godthåb Bryghus-imi pisortaaneq Nicolai Nissen, Sermitsiaq.AG-mut oqarpoq.
Pilerisaarinermut inerteqquteqalernerup sunniutaasa ilagaat, takoriat tuusintilikkuutaat, kalaallit pilersitaannik soqutigisaqartunut, immiorfimmi takornariartitsisarnerup unitsittariaqalernera.
Takorianik takornariartitsineq unitsinneqartoq
- Ukioq kingulleq 50-eriarluta takornariartitsivigut, kinguneranillu immiaaqqanik tammajuitsunillu assigiinngitsunik tunisaqarpugut. Takornarianut pilerisaarisinnaannginneq immiorfiuteqarnermillu oqaluttuarsinnaannginneq peqqutigalugu, kaaviiaartitatigut millionit affaanik annaasaqaatigisimassangipput ilimagaara. Tassa takornariat immikkut misigisassaarupput, immiorfimmi pisortaaneq inerniliivoq.
Nicolai Nissenip paasissutissiaraa, neriniartarfinni imerniartarfinnilu pigisamini aammalu avammut nioqqutigineqartussanik, immiorfik immiaaraliornerminik ingerlatsiinnassasoq.