Imigassamut inatsimmut akerliuneq eqqartuussisulersuutigineqarsinnasoq
Peqqissutsimut Naalakkersuisoqarfiup pisiniarfiutilik Martin Shandy Shalmi Vinslottet-imik piginnittoq politiinut nalunaarutigissallugu siorasaarivoq. Siorasaaringaluarneq pisiniarfiutillip eqqissisimassutigaa.
Vinslottet-ip nittartagaani facebookimilu quppernerani pisiniarfiup nioqqutissaataanik ussassaaruteqarfiusut akerleriissutigineqarput.
- Vinslottet A/S Facebookikkut nittartakkamikkullu internetikkut ussassaarivoq, tamannalu imigassaq pillugu inatsimmi ussassaareqqusaannginnermut akerliuvoq, Peqqissutsimut Naalakkersuisoqarfiup aprilimi nakkutilliinerani erseqqissarneqarpoq. Tamanna kommuneqarfiit pingaarnersaanni Aningaasaqarnermut Inuussutissarsiornermullu Ataatsimiititap ataatsimiileruni eqqartungassaasa ilagaat.
Vinslottet: Inatsit malipparput
Kommune Vinslottet-imut oqaaseqaammik piniarsimavoq, imatullu allappoq.
- Vinslottetip nittartagaa Danmarkimi wannafind.dk A/S-imit siammarterneqarpoq taamaalillunilu nunani allani tusagassiuutaavoq. Nittartakkamut iserniaraanni atuisoq nammineq uppernarsaassaaq 18-it sinnerlugit ukioqarnini pillugu. Nittartagaq annerusumik Danmarkimi sullitatta atugarivaat, Kalaallit Nunaanni ilaquttaminnut, ikinngutiminnut niuernermilu attaveqaatiminnut tuniserusuttunit, nittartagaq pillugu allassimavoq pisiniarfiullu facebookimi quppernera pillugu nanginneqarluni:
- Vinslottetip facebookimi nittartittagaa Facebook Inc-imiippoq, taanna amerikamiut suliffeqarfiutigivaat Nasdaq-mi aningaasanik niuerfimmi nalunaarsorneqarsimasuulluni, taamaalillunilu nunani allani tusagassiuutaalluni, Vinslottet allappoq inerniliillunilu:
Taamaalilluni Vinslottet Grønland A/S imigassaq pillugu inatsit sutigut tamatigut malippaa.
Martin Sandy Shalmip politiinut nalunaarutiginnittoqarsinnaanera eqqissisimassutigaa.
- Ilisimavara uanga pillunga naalakkersuisoqarfik politiinut nalunaaruteqarsinnaammat. Politiilli suliamik ingerlatsinissaat qularutigilluinnarpara, pisiniarfiutilik Sermitsiaq.AG-mut oqarpoq. Taanna isumaqarpoq, suliassanngortitsinissamut inatsisitigut tunngavissaqanngitsoq.
Suliaq quianartoq
- Suliaq ullunik arlalinnik piffissannut tigusisimasoq quianaannarpoq, Martin Sandy Shalmi erseqqissaavoq.
Taanna isumaqarpoq, suliaq eqqartuussisulersuutigineqassangaluarpat inuiaqatigiit aningaasaataannik asuli atuinerussasoq. Qularutiginngilluinnarpaami inatsisit maleqqissaarlugit.
Suliffeqarfimmut Kiffartuussiviup Aningaasaqarnermut Inuussutissarsiornermullu Ataatsimiitita mut inassuteqaatigaa, peqqissutsimut naalakkersuisoqarfiup Vinslotte-p politiinut nalunaarutigineqarnissaa akuereqqullugu.
Naammangitsumik assiaqusersuineq
Pisiffillu Nuuk Centerimiittup kioskimi viinninullu immikkoortortaqarfimmi naammaginanngitsumik assiaqusersuisimanerat pissutigalugu aamma peqqissutsimut naalakkersuisoqarfimmiit politiinut nalunaarutigineqarsinnaasimavoq.
Peqqissutsimut naalakkersuisoqarfimmi sulisut sulinngiffeqarnerat sulisunillu napparimasoqarnera pissutigalugu oqaaseqartissinnaasimanngilagut.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...