Høegh-Dam ingerlatseqatigiiffiat akiliisinnaajunnaalertoq
Iluliaq Seafood A/S akiliisinnaajunnaalertoq 2017-imi ukiumut naatsorsuutini, aarlerinartunik arlalinnik imaqartumi, allassimavoq.
Ingerlatseqatigiiffik aalisarnermik aalisakkerinermillu suliaqartuusoq 2017-imut naatsorsuutini ukiup siulianut sanillersuullugu amigartoorutit 1 million koruuninik qaffariaateqarsimasut.
Angusani 1.484.656 koruunit amigartoorutigineqarput. 2016-imi ingerlatseqatigiiffik 406.106 koruuninik amigartooruteqarsimavoq.
Akissarsiat qaffariangaatsiarput
Ingerlatseqatigiiffik ataasiinnarmik sulisoqarpoq: atuarfimmi pisortaq Bitten Høegh-Dam uialu Kim Høegh-Dam siulersuisuni siulittaasuulluni.
2017-ip ingerlanerani akiitsut 5,2 millioner koruuniniit 10 millioner koruuninut qaffariaateqarput. Aningaasaqarnikkulli taama inissittoqaraluartoq ingerlatseqatigiiffimmit aalajangiunneqarpoq Bitten Høegh-Dam akissarsiai 137.383 koruuninik qaffanneqarlutik ukiumut akissarsiai 457.775 koruuninngussasut.
Pisiortorfinnut akiitsoq qaffakkiartupiloortoq
Nioqqutissanik pisiortorfiit kiffartuussiviillu 2,84 millioner koruuninik tigusassaqarput, tamanna ukiup siulianiit qaffasinnerungaatsiarpoq ukiummi siuliani taamaallaat 97.490 koruuniusimangaluaramik.
Ingerlatseqatigiiffiup ingerlatsiinnarsinnaanera qularnartoq, naatsorsuutini allassimavoq.
- Ingerlatseqatigiiffik aningaasaliisartunit aningaasaliiffigineqaruni aatsaat ingerlaannarsinnaavoq. Aqutsisulli nalilerpaat, suli aningaasaliisoqartassasoq, nalunaarummi paasissutissiarineqarpoq.
Naatsorsuutit kukkunersiorneqassanngitsut
Aqutsisut oqaaseqaataanni aamma allassimavoq, ataatsimeersuarnermi aalajangiunneqarsimasoq “ingerlatseqatigiiffiup ukiumut naatsorsuutai kukkunersiorneqassanngitsut. Ukiumut naatsorsuutit kukkunersiorneqannginnissaat pillugu piumasaqaatit naammassineqarput”, tallimanngormat ulloq 10. august naatsorsuutit akuerineqarmata, aqutsisut erseqqissaapput.
Ingerlatseqatigiiffimmi siulersuisuni ilaasortaapput siulittaasoq Kim Høegh-Dam ilaasortallu Qoqa Lund Høegh, Bertel Kristensen aamma Bitten Høegh-Dam.
Kukkunersiusut nalunaarutaat
Kukkunersiuisarfik pisortanit akuerisaq Kenneth Bach Holmegaard, Multi Revision I/S, kukkunersiuilluni nalunaarummi paasissutissiaraat, “ingerlatseqatigiiffiup naatsorsuutini allattungaataat paasissutissaataalu allat taakkunannga tunniunneqarsimasut tunngavigalugit”, taamaallaat naatsorsuisoqarsimasoq.
- Ukiumut naatsorsuutit eqqortuunersut naatsorsuinermilu paasissutissat tamakkiinersut, taakku akisussaaffigaat, kukkunersiuisartoq pisortanit akuerisaq oqarpoq imalu itisiliilluni:
- Aningaasaqarnermut paasissutissanik naatsorsuineq qularnaarlugu nalunaajarneqarsinnaanngimmat, paasissutissat ukiumut naatsorsuutinut atungassatut tunniussimasassi eqqortuunerat tamakkiineralluunniit uppernarsarnissaannut pisussaaffeqanngilagut. Taamaammat ukiumut naatsorsuutit naatsorsuinermut inatsimmut naapertuunnersut oqaatigisinnaanngilarput, kukkunersiuisartoq paasissutissiivoq.