Hashi pillugu unnerluussat arfineq-marluk tamarmik pisuutinneqarput

Inuit arfineq-marluk ukiuni arlalinni hashimik 60 kiilumik anngiortumik eqqussisimasutut unnerluutigineqartut, ullumi eqqartuussivimmi pisuutinneqarput.

Eqqartuussaasut arfineq-marluk eqqartuunneqarnermi kingorna, Nunatta Eqqartuussisuuneqarfianut suliassanngortitseqqinnissamut tunngatillugu ulluni 14-ini eqqarsarnissamik piumasaqarput. Eqqartuunneqartut suliassanngortitseqqissanerlutik eqqarsaateqarneranni, unnerluussisup Tobias Bergip piumasaqarnerata kingorna, eqqartuunneqartut arfineq-marluk tigumigallaannarneqarnissaat eqqartuussiviup aalajangiuppaa.

Eqqartuussutit sakkortunersaat

Eqqartuussutit sakkortunersaat A-mut pineqaatissiissutigineqarpoq, taanna tunuliaqutaasutut oqaatigineqarpoq, arlalinnillu allanik nakuusernermut aamma sioorasaarinernut unnerluunneqarpoq. Taanna ukiuni tallimani qaammatinilu arfineq-pingasuni pineqaatissinneqarpoq.

Unnerluutigineqartut allat tallimat ukiuni tallimani tigummineqarnissamut pineqaatissinneqarput, arnartaat ukiuni pingasuni qaammatinilu qulingiluani tigummineqartussanngortinneqarluni.

Unnerluussisoq naammagisimaarinnittoq

- Eqqartuussut naammagisimaarpara, eqqartuussinerup kingorna Tobias Berg Sermitsiaq.AG-mut ilisimatitsivoq, taannalu unnerluussisussaatitaasut anngiortumik hashimik eqqussuineq pillugu pisuni pingasuni isumaqatigineqarnermut innersuussivoq.

Eqqartuussisup eqqartuussutinut tunngavilersuutimini unnerluutigineqartut Akileraartarnermut Aqutsisoqarfimmut aningaasat nalunaarsugaannit aningaaserivimmi kontominnut ikioragaannut annertuumik nikingasoqarnera pingaartippaa. Tamanna oqarasuaatitigut isertortumik immiussinertigut aamma ilisimannittut nassuiaanerisigut annertuumik uppernarsaateqartoqarneranik peqateqarneranik, eqqartuussisup eqimattat aaqqissuussaalluartuunerarpai.

Inatsisaatsutut pissusilersortut

- Aaqqissuussaasumik pinerluuteqartoqarnera tassani pineqarpoq, illoqarfimmi ‘’sakkutuulerluni’’ allanik sioorasaaraluni akiliisitsiniartoqarsimavoq. Inatsisaatsutut pussusilersornerit akuersaarneqarsinnaanngillat, eqqartuussisoq naqissusiivoq.

Pineqaatissiissutip sivisussusissaanik uuttuinermut atatillugu unnerluutigineqartut aningaasanik aamma pigisanik amerlasuunik arsaarinniffiginissaat saniatigut aalajangiiffigineqarpoq.

Arsaarinnissutaasut

  • Unnerluunneqartoq A, tunuliaqutaasutut oqaatigineqartoq, 4 millionit koruuninik arsaarinnissuteqarfigineqartussaq, ilaatigut ukuninnga arsaarneqarpoq: illuinnarsuut, Go Pro filmiliuut, rubiinit, qoorortooq, landcruiser, umiatsiaq, ATV, crossmaskine aamma qamuteralaat.

  • Unnerluutigineqartoq B, hashimik agguaasoq, 1,5 millionit koruuninik arsaarneqarpoq, ilaatigut hashimik, skunkimi, qoorortuumik aamma MacBookimi arsaarneqarluni.

  • Unnerluunneqartoq C, allakkerivimmi sulisut marluk aappaa, 1,5 millionit koruuninik arsaarneqarpoq, ilaatigullu jointsit, hashi aamma pigisanik ataasiakkaanik.

  • Unnerluunneqartoq D, allakkerivimmi sulisup aappaa 1 million koruuninik arsaarneqarpoq, ilaatigullu iPad, Playstation 4 aamma Audi A6.

  • Unnerluunneqartoq E, Københavnimit Nunatsinnut hashimik nassiussusisoq 750.000 koruuninik arsaarneqarpoq, ilaatigullu iisartakkat ecstacyt, hashit, mobili, iPad aamma silaannaarsilluni poortuutigineqartartoq.

  • Unnerluutigineqartoq F, aningaasanik nuussuisoq, 750.000 koruuninik hashimillu arsaarneqarpoq.

  • Unnerluunneqartoq G, aningaasanik ikinnerusunik nuussisimasoq 250.000 koruuninik aamma mobilimik arsaarneqarpoq.

Eqqartuunneqartut aamma suliamut aningaasartuutaasunut akiliisussanngortinneqarput.

Powered by Labrador CMS