Greenland Ruby: Amigartoortoqaraluartoq isumalluartoqarpoq

Oqartoqarsinnaalluarpasippoq, Greenland Ruby A/S-ip takutikkaa, ujaqqanik erlinnartuliassanik piiaaveqarneq qanoq ajornaatsuinnaanngissimatiginersoq.

Sermitsiaq allappoq.

Ingerlatseqatigiiffiup piginnittaata Norgemeersup annertoorujussuarmik aningaasalersuisimanerata takutippaa, ujaqqanik pinnersaasiassanik piiaaffeqalertigani aningaasat annaaratarsinnaasat amerlasoorujussuit atorneqartariaqarsinnaasut piareersimatinneqartariaqartut. Tamanna ersersinneqarpoq akileraarutit ilanngaatigereernagit 85 millionit koruunit sinnerlugit amigartoortoqarneratigut aammalu ingerlatseqatigiiffiup 2017-mi naatsorsuutaani siunissaq pillugu nalorninartumik inissisimalersoorsinnaanermut aarlerinartoqarneranik nalunaarusiornikkut.
Taamaattorli ingerlatseqatigiiffiup aqutsisuisa nalunaarutaanni, ingerlatseqatigiiffiup ingerlaannarsinnaaneranik mianersoqqusinermik imaqaraluartoq, ingerlatseqatigiiffimmi siulittaasoq, Gunnar Moe, ingerlallualertoqarneranik qularutiginninngilaq:

- Annertuumik isumakulunnissamut pissutissaqanngilaq, aamma pilersaaruteqanngilavut suliatta unitsinnissaanik. Ilaatigut aningaasatigut najummatsisimanartorsiorsinnaasarnerput, allatut nassuiaatissaqarpoq. Tassungami pissutaavoq, niuffaffinnut appakaanniarnerput, naatsorsuutigisatsinnit sivisunerusumik inerisarsimagatsigu.

- Pisariaqartilluinnarparput niuffaffissuarnut pulaternissatsinnut pitsaasumik aammalu eqqortumik piareersarsimanissarput. Tassungalu ilutigitillugu niuffanneq ukiuni kingulliunerusuni allanngorsimaqaaq, tamatumalu malitsigisaanik pilersaarutigisaraluavut allanngortillugit allaanerusumik iliuuseqartariaqalersimavugut, tamannalu aningaasarpassuarnik akeqarsimavoq. Maannakkut pisut, assut isumalluarnarput pitsaallutillu, Greenland Ruby-p, Qeqertarsuatsiaat qanittuani rubinisiornermik ingerlataqartup, siulersuisuini siulittaasoq erseqqissaavoq.

Allaaserineqartoq aviisimi Sermitsiami atuarneqarsinnaavoq. Aviisi uani pisiariuk:

Sermitsiaq Uge 24 2018

Klik her for at læse