Atualerneq: Ilinniarnertuunngornialertut siornatut amerlassuseqartut
Nunatsinni ilinniarnertuunngorniarfinni sisamaasuni ukioq manna ilinnialertut amerlapput. Kisianni aamma atuartut taamaatittarnerujussuat ilnniarnertuunngorniarfinnit akiorneqassaaq.
Ulluni makkunani inuusuttorpassuit neriulluartut ilinniarnertuunngorniarlutik aallartipput, atuartut katillugu 529-t amerlassuseqartut ukiuni pingasuni atuarneq aallartippaat. Siorna atualertut 526-usimapput.
Nuummi amerlanerusut
Illoqarfiit pingaarnersaanni ilinniarnertuunngorniarfimmi, GUX Nuummi, atuartut nutaat 206-it aallartissapput, taakku klassinut arfineq-pingasunut agguataarneqarsimapput. 2017-imut sanilliullugu atuartut 30-nik amerlanerupput, tassani 176-iusimammata.
- Aallartittut amerlasoorujussuupput. Aatsaat siullermik ukiumi atuarfiusumi atuartut 500-nit amerlanerusut aallartikkunarput, rektori Mikael Enggaard oqaluttuarpoq.
Aasiaat GUX-imi ilinnialerlaat 165-t aallartipput, ukiup siulianut sanilliullugit qulingiluanik amerlanerupput, taamani atualertut 156-iugamik. Taakku klassinut arfinilinnut agguataarneqarput, rekori nutaaq, Dorthie Siegstad ilisimatitsivoq.
Qaqortumi Sisimiunilu ikinnerusut
Kujataani GUX Qaqortumi ilinniarnertuunngorniarfimmi atuartut nutaat 72-it aallartissapput, taakku ukiup siulianut sanilliullugu 11-nik ikinnerupput. Taakku amerlanngitsut, rektorinngorlaaq Brian Alarik Johansen oqaluttuarpoq.
- Klassit amerlanerpaaffissaat 25-iupput, ukioq manna klassit amerlanerulaarsimasinnaagaluarput, taanna oqarpoq.
Sismiuni GUX-imi atuartut nutaat 86-it aallartissapput, 2017-imut sanilliullugu 25-nik ikinnerupput, taamani 111-t atualermata. Qinnuteqartut ikinnerunerannik tamanna ilaatigut pissuteqartoq, ilinniarnertuunngorniarfik ilisimatitsivoq.
Taamaatiinnartartut akiorneqarnerat
Kisianni ukiut pingasut atuareernerup kingorna atuarnerminnik naammassisartut amerlanngillat. Tassami ilinniarnertuunngorniat akornanni taamaatiinnartarneq nunatsinni ajornartorsiutaavoq annertooq. 2017-imi ilinniarnertuunngorniartut tamarmik affaat sinnilaarlugit atuarnerminnik naammassinnipput.
Ilinniartitaanermut pilersaarusiami nutaami, Ilinniartitaanermut Naalakkersuisoqarfiup suliaani saqqummeqqammersumi, ”Ilinniartitaanermut Pilersaarut II – 2018”, 2024-mi ilinniarnertuunngorniartut 75 procentiisa naammassisalernissaat anguniagaavoq.
GUX Nuummi rektori, Mikael Enggaard, anguniagaq piviusorsiortuusoq isumaqarpoq, kisianni aamma inuiaqatigiinni ataatsimut suliassaq annertuujunerarlugu.
Inuiaqatigiit suliassaat
- Ilinniarnertuunngorniarfiit kisimik suliassarigaat oqaannartoqarsinnaanngitsoq isumaqarpunga, inuiaqatigiimmi suliassaraa, taanna oqarpoq, assersuutitullu atuartut inuuniarnermikkut aamma tarnimikkut ajornartorsiuteqarlutik katsorsarneqarsimanngitsut atuartuutigilertarlugit oqaatigaa. Taamaalilluni atuartup naammassinninnissani ajornakusoortittaraa.
- Kisianni aamma oqaatigisariaqarpara, Ilinniartitaanermut Naalakkersuisoqarfiup ilinniarnertuunngorniarfiit akornanni ikinnerpaanik taamaatitsisoqartunut nersornaasiuttagaa ukiuni tulleriinni pingasuni pissarsinikuunerput, Nuummi GUX-mi rektori oqarpoq.
Naammassinnittartut procentinngorlugit 65-70 procentit missaaniittartut, Mikael Enggaard ilisimatitsivoq. Angusanut siuliinut sanilliullugit kusanartuusoq, taanna isumaqarpoq.
Siunnersuineq nutaaq
Atuartunut siunnersortit ukioq manna suliassanut marlunnut avillugit misilinneqalersoq, Aasianni GUX-imi rektori, Dorthie Siegstad ilisimatitsivoq. Ilinniarnermut siunnersorti ilinniarnermut tunngasuinnarnik siunnersuisassaaq, ’skolekonsulentilu’ inuttut inissisimanermut tunngasunik siunnersuisarluni.
Uani ukiumi atuarfiusumi atuartut attatiinnarnissaannut aamma atuarnermik naammassinninnissaq ukkatarineqassasut, Brian Alarik Johansen ilisimatitsivoq.