Assigiinngitsitsinermut asissuinerillu qaangerniarlugit GIF suliniuteqartoq

Kalaallit Nunaanni Timersoqatigiit Kattuffiata suliniut Killiliisa tapersersorpaat aammalu siunissami qaninnerusumi ungasinnerusumilu timersornerup iluani iliuuseqartoqartoqarsinnaanersoq misissorniarlugu.

Asissuinerit, sumiussuneq aallaavigalugu nikassaaneq, suiaassusermut tunngatillugu nikassaaneq, kinguaassiutitigut kanngutsaatsuliorneq atornerluinerlu timersornermi inissaqanngillat. Tamanna Kalaallit Nunaanni Timersoqatigiit Kattuffiata oqariartuutigaa. Suliniut 'Killiliisa' kattuffimmit aamma tapersersorneqarpoq.

- Asissuineq, sumiussuneq aallaavigalugu nikassaaneq, suiaassusermut tunngatillugu nikassaaneq, kinguaassiutitigut kanngutsaatsuliorneq atornerluinerlu akuersaarneqanngilluinnarput, kattuffik tusagassiutinut nalunaarummi allappoq.

Nunanit allanit misilittakkat
- Ajornartorsiutit taamaattut suliariniarnerinut sakkussagut suli ikippallaarput, taamaattumik ilaqutareeqarnermut naalakkersuisoqarfimmut siunnersoqqulluta saaffiginnippugut taamatullu nunanut allanut isumassarsiorniarluta - pingaartumik nunani avannarlerni ikinngutitta kattuffiisa iluini qanoq iliortarnersut isumassarsiorfigerusullugit isiginiarpavut. Tamatuma saniatigut sulianut taamaattunut misilittagaqarluartunut attaveqassaagut, Kalaallit Nunaanni Timersoqatigiit Kattuffiat allappoq.

Norge assersuutigissagutsigu, Norgemi pissuserissaarnissamut malittarisassat tamanut atuuttut uku suliarivaat:

  • Inoqatitit ataqqikkit aammalu allanut oqaatsitit, iliuutsitit pissusilluunniit saassussinertut paasisariallit pinngitsoortikkit.
  • Timikkut attuunneq piumaneqanngippat pinaveersaartiguk.
  • Oqaatsit tiinganermut tunngasut imaluunniit tinnganermut tunngasutut paasineqarsinnaasut pinaveersaartikkit.
  • Oqaatsit, quiasaarutit isummallu timersortartup suiaassusaanut imaluunniit sunoortuuneranut tunngasunik nikanarsaataasinnaasut pinaveersaartikkit.
  • Suiaassutsit tamarmik tapersersueqatigiittutut saqqummiunniarsarikkit.
  • Allanik inoqanngippat imaluunniit angajoqqaat/angajoqqaarsiat timersornermik ingerlatsivilluunniit isumaqatigiisiorfigeqqaartinnagit timersortartut atisaajartarfianni timersortartut attaviginissai pinaveersaartiguk.
  • Timersortartup, sungiusaasup imaluunniit aqutsisup namminerisamik inuunera ataqqiuk.
  • Timersortartoqatigisamik sammisaqarneq pinaveersaartiguk. Taamaattoqassappat tamanut ammasumik paasissutissiissutigineqassaaq.
  • Akissarsinissamik siunertaqarluni imaluunniit kinguaassiutitigut akilerneqarnissamik siunertaqarluni iliuuseqartoqassanngilaq.
  • Malittarisassat uku unioqqutinneqarsimappata iliuuseqarlutit nalunaarutigiuk.

Nunatsinni inatsisit malillugit meeqqanut pinerliisimannginnermik uppernarsaatit suliarineqassasut piumasaqaataavoq, taamaattumik timersoqatigiiffinni tigooqqaalluni misiliinikkut kattuffik nakkutiginnittarpoq.

- Tigooqqaallunilu misiliineq kisiat atorneqarsinnaanngilaq. Kalaallit Nunaanni Timersoqatigiit Kattuffianni ileqqorissaarnissamut allassimanngitsunik malittarisassiornikuuvugut tamannalu suliuniuteqarnikkut immikkut isiginiarparput, tassanilu fairplay, ataqqinninneq, timersortartorpalaarneq maligassiuisuunerlu suliniummi oqaatsit sisamat taakku tunngavigaagut.

Pikkorissaanerit ineriartortitsinerlu

Sungiusaasutut pikkorissaanikkut peqatigiiffimmilu inerisaanikkut piginnaasanik ineriartortitsinissaq kiisalu timersornerup silarsuaani pissutsit peqqinnarnerusumik ingerlalernissaat neriuutigineqarpoq.

- Timersornerulli iluani arlaannik pisoqassagaluarpat arlaannaannulluunniit illersuinata pisinnaanngilagut, kikkut tamarmik uagullumi akisussaaffimmik tigusisariaqarpugut. Kattuffittut qanoq iliuuseqartussatut piumasaqarfigineqarneq isiginiassavarput aammalu pisunik qanoq aaqqiinissamut kikkut suleqatigisinnaanerlugit isiginiassallugu, Timersortartut Kattuffiat tusagassiutinut nalunaarummi allapoq.

Novembarimi sinniisut aallartitat ataatsimiinnissaat tullernguuppoq, tassani kattuffik suliaq pillugu oqaloqatigineqassaaq.

Powered by Labrador CMS