Aleqa qinersisoqareertinnagu statsministerissamik toqqaarusunngilaq

Nunatta Qitornai tunuliaqutaralugit folketingimi ilaasorta kikkut tapersersorniarlugit siumoortumik oqaatigerusunngilaa. Kalaallit Nunaannut sunniuteqarsinnaanerpaarmi toqqarusuppaa

Naak Nunatta Qitornai Siumumik Nunatsinni suleqateqaraluartoq, Danmarkimi Socialdemokratit siulittaasuat Mette Frederiksen siumoorluni tapersersorusunngilaa.

Altinget allappoq.

- Kalaallit Nunaannit qinikkanik isumaqatiginninniarluarnerpaaq toqqassavara, Altingimut Aleqa Hammond oqarpoq.

- Siumoorluni toqqaareerneq silatusaarnerusussaanngilaq. Kalaallinut pingaarutilimmik aalajangiisinnaasoq toqqassavara. Siumoortumik toqqaareernikkut tamanna aalajangiunneqarsinnaanngilaq, tassami Kalaallit Nunaata sunniuteqarnerpaanissaa pingaartuussaaq, oqarpoq.

Aleqa Hammond Siumumi ilaasortaagallarami Socialdemokratinik tapersersuisuuvoq. Attaviitsunngorami maanna Danmarkimi naalakkersuisuutitaqartut tapersersulerpai, tamannalu kinguneranik Folketingimi Kalaallit Nunaat pillugu ataatsimiititaliami siulittaasuulerluni.

Folketingimut qinersinermi kingullermi Aleqa Hammond 3.759-nit taaguunneqarpoq.

Powered by Labrador CMS