Akisunaarineq: Umiarsuaq pisariaqanngitsumik ujaasinermik aallartitsisoq
Norskit umiarsuaat nalunaartussaanermik malinninnginnami, taamaalillunilu ujaasinermik annertuumik aallartitsigami akiligassinneqarlunilu taarsiinissamut piumasaqarfigineqarpoq
Piffissami matumani Nunatta imartaani angalasut Aasiaat Radioanut nalunaartussaatitaanertik ilisimanngilaat. Kalaallit Nunaanni Politiit tusagassiuutinut nalunaarummi taama allapput.
Umiarsuup akunnerni amerlasuuni Aasiaat Radioanut sumiiffimminik nalunaaruteqannginnera tunuliaqutigalugu, junimi Kujataani ujaasinermik annertuumik aallartitsisoqarpoq. Umiarsuaq attavigineqarsinnaasimanngilaq, ulorianartorsiornersut imaluunniit arlaatigut ikiortariaanersut paasineqarsinnaanani.
Taamaattumik ujaasinermik aallartitsisoqarpoq, Aasiaat Radioa ajunaalernermik kalerrisaarummik umiarsuarnut ungasinngisaaniittunut nalunaaruteqarpoq. Umiarsuup ajunaalerneranik imaluunniit ajunaalinnginneranik nalunaaruteqartoqanngilaq.
Tamanna tunuliaqutigalugu suleqatigineqartut sinnerit nalunaarfigineqarput, tassanngaanniillu ujaasinermik annertuumik aallartitsoqarnissaanik aalajangiisoqarpoq, Kalaallit Nunaanni Politiit kiisalu Issittumi Sakkutooqarfik peqatigalugit.
Qulimiguulik S-61 aamma angallatit umiarsuarmik ujaasiartortinneqarlutik aallartinneqarput. Kingorna umiarsuaq umiarsuarmit allamit qanittuaniittumit takuneqarpoq, kisianni aatsaat unnuap ingerlanerani umiarsuaq attavigineqarpoq, taakku nalunaarutigaat tamarmik ajoquteqaratik. Ajunaalertoqarsimanngivippoq, nalunaartussaatitaanerliuna malinneqarsimanngitsoq.
- Kalaallit Nunaanni Politiit umiarsuit Aasiaat Radioanut sumiiffimminnik nalunaaruteqanngitsunut nukippassuit atortarpaat. Taamaammat sumiiffik nalunaarutiginnikkaanni SAR-imik ujaasinermut aamma annaassiniarnernut nukissatsinnik naapertuutinngitsumik atuineruvoq, kisianni ajornerpaatillugu inunnik navianartorsiortunik eqquisoqarsinnaavoq, politikommissær Johan Westen allappoq.
Suliami pineqartumi umiarsuup naalagaa talittarfimmut pimmat killisiorneqarpoq, nalunaartussaatitaanermullu inatsimmik ilinniartinneqarluni. Tamatumali kingorna umiarsuaq unioqqutitseqqippoq.
Pisoq naapertorlugu Kalaallit Nunaanni Politiit umiarsuup naalagaanut 4.000 koruuninik, umiarsuup piginnittuanut 40.000 koruuninik, aammalu piginnittumut SAR-imik ujaasinermut taarsiinissamik 200.000 koruuninik piumasaqaateqartoqarpoq.