Akiitsulinnut siunnersuineq angusaqarfiulluartoq

Kommune Kujalleq aamma INI A/S suleqatigiillutik innuttaasut akiitsoqalersimasut akiliisinniarnerat iluatsippaat.

Kommune Kujallermi suliniummi misiliutaasumi pitsaasumik angusaqarfiusimasoq, Aningaasaqarnermut Naalakkersuisup Pele Brobergip IA-p siulittaasuanut Sara Olsvigimut paragraf 37 naapertorlugu akissuteqaataani allassimavoq.

Innuttaasut ujartorneqartut

Suliniut ukuni marlunni ingerlanneqassaaq, tassani immikkut siunnersuisartut innuttaasunik akiitsoqalersimasunik ujartuisassallutik.

- Taamaalilluni akiitsulinnik siunnersuisarnermik suliniummi siunertaavoq kommuni suleqatigalugu aaqqiissutissanik, ataasiakkaat inigisaminniiginnarsinnaanissaannik qulakkeerisinnaasunik, Pele Broberg akissuteqarluni allappoq.

Angusat

Ukioq manna kvartalimi siullermi siunnersuisartut 422-riarlutik oqaloqatiginnissimapput, tamannalu ima angusaqarfiusimavoq:

  • Akiitsut akilinngitsuukkat ingerlaannaq akilerneqartut: 113
  • Akiitsut akilinngitsuukkat kingusinnerusukkut akilerneqartussanngortut: 78
  • Akiitsut akilinngitsuukkat akilersorneqarnissaat isumaqatigiissutigineqartut: 63
  • Attartortut akiliinissamut periarfissaqanngitsut: 45
  • Akiitsut akilinngitsuukkat Kommune Kujallermit
    akilerneqartut: 64

Pele Broberg erseqqissaavoq,
“suliniuteqarnerup pitsaasumik sunniuteqarnera taamaaginnassanersoq imaluunniit qaangiuteqqiinnassanersoq, inaarutaasumik naliliiffiginissaa maannakkorpiaq
siusippallaarpoq”.

Nuna tamakkerlugu pilersaarut

Naalakkersuisut ukiup tulliani kommunit allat aamma INI A/S peqatigalugit suliniutip nuna tamakkerlugu ingerlanneqarnissaa pilersaarutigaat. Innuttaasulli akilinngitsuukkanik akiitsoqarnermik ajornartorsiuteqartut kisiisa ukkatarineqannginnissaat pillugu atituumik siunnersuinermik suliaqarneq siammarneqassaaq.

Powered by Labrador CMS