Aaqqissuisuuneq innersuussivoq: Ukioq ataaseq qaangiuttoq eqqarsaatit qaffakaapput
Qaqqap sisooqqissinnaanera pissutigalugu Nuugaatsiaq Illorsuillu tikinneqaqqusaanngikkallarput. Angerlarsimaffiit aalisarfiillu nutaat nunaqarfinni pineqartuni eqqugaasut sungiunniartariaqarsimavaat
Ukiup ataatsip matuma siorna aalisartoq ilaqutariinnilu ataataasoq Karl Peter Møller Nuugaatsiameersoq aqqunartitersimaqaluni Dronning Ingridep peqqissaavianut aallarunneqarpoq. Maanna Uummannami illutaarnissamik tungaanut Uummannami najugarigallakkaminni pequttamik amerlanersaat tigoreersimalerpaat. Pereersup akuerinera ingerlaqqinniarnermut oqilisaataasimasoq, oqaluttuarpoq.
- Qujanartumik siorna tassaarsuaqarnerni aqqunartitersimanikka qaangerluarpakka siornatigutullu aalassaritsigileqqillunga, Karl Peter Møller oqarpoq.
Misigissutsit annertuut
Siorna junip 17-ni tassaarsuarnerani tupinnaannartumik annappoq qaqqami Karrani sisoortoqarnerani malerujussuit qaarmata Nuugaatsiarmiut sisamat ajunaarnerannik kinguneqartut. Arlallit tassani aamma aqqunartiterput.
Karl Peter Møller ilaquttanilu utaqqiisaasumik Uummannami initaartinneqarput Nuugaatsiamullu pigisanik aallertut arlaqanngitsut akornanniippoq. Ikittuinnaat aallernissamut akuerisaapput qaqqarsuup sisooqqissinnaanera ernummatigineqarmat tamannalu pissutigalugu Nuugaatsiarmiut Illorsuarmiullu tamarmik qimagutsinneqarlutik.
- Siorna pigisatsinnik aallerluta illutta silataanut pigama qissasiinnarpunga aatsaallu qiajunnaarama ingerlaqqillunga. Nunaqarfimmut peqqinnermi misigissutsit sakkortuut takkupput. Malissuit illorput illuartissimavaat qujanartumilli illup iluani pigisavut tamangajammik innarlersimanngillat. Taamaattoq nassaruminarnerit kisiisa Uummannaliaappavut, Karl Peter Møller oqaluttuarpoq.
Taarsiinerit
Malissuit meterinik arlalinnik portussusillit Nuugaatsiap nuuttaanut qaarmata aalisarnermut atortut umiatsiaaqqallu annaaneqarput. Snescooterit, qimmit, illuaqqallu angallattakkat malissuarnit amuneqarput aseruatiterlutillu.
- Umiatsiaaqqat snescooterillu taarserneqarput illuaqqalli angallattakkat sikumi aalisarnermi isersimaarfiusartut taarserneqanngillat. Taakku atortarpavut aalisarfigisakkavut issittorujussuusarmata. Aalisarfinnut sungiusimasatsinnut Uummannamiit ungasiarpoq. Uummannap eqqaani aalisarfiit killilimmik ilisimavagut sulilu taakku sungiunniarsaralugit, Karl Peter Møller oqarpoq.
Nuugaatsiap eqqaani aalisartoqarsinnaagaluarpoq, aalisartulli ilisimatinneqarsimapput isumannaallisaaneq nammineq akisussaaffigissagaat tassani aalisassagunik qaqqap sisooqqeratarsinnaanera pissutigalugu.
Ilaquttanilu Uummannami utaqqiisaagallartumik illoqarput maannalu illutaassamik sanallugu piareernissaa utaqqillugu. Eqqaaneqareersutut suli sillimaqqissaartoqarpoq taamaattumillu Nuugaatsiarmiut Illrsuarmiullu utaqqiisaagallartumik angerlarsimaffeqarnissartik naatsorsuutigisariaqarlugu. Nunaqarfimminnut aamma aatsaat utersinnaapput illut atortorissaarutillu annertuumik iluarsartuunneqareerpata.
Angerlarserneq
- Pisut akuerinerisigut allami najugaqarneq sungiukkuminarnerusutut ippoq. Taamannali taama ajornanngitsigiuaannanngilaq ilaatigummi angerlarserneq nunaqarfitsinnullu kipilernerput takussinnaasarpoq, Karl Peter Møller oqarpoq.
Illorsuarmiut Nuugaatsiarmiullu 270-it missaanniittut Qeqertarsuup tunuanut, Uummannamut nunaqarfinnullu qanitaaniittunut inissinneqarnikuupput.
- Nalunngilara Qeqertarsuup tunuanut inissikkallarneqartut Uummannap sulluanut uteqqikkusukkaluartut. Kisianni inissiat killeqarput aammalu ilaat iluatsitsinerliortut oqulinnut inissikkaluarneqartut allanik inissarsiuunneqartariaqarsimallutik, Karl Peter Møller oqaluttuarpoq.
Aviisimut AG-mut uani ataani linki aqqutigalugu isissutissarsigit: