SIULERSUISUNI SIULITTAASOQ
Tusagassiorfik ingerlalluartoq
Tusagassiuuteqarnermi nutaarsiassaannaat tunngavigalugit ingerlatsisoqarsinnaanngilaq, Tusagassiorfimmi Sermitsiami siulersuisuni siulittaasoq taama oqarpoq, tusagassiorfiit allat ilungersunartorsiuleruttorneranni, tusagassiorfik sinneqartooruteqarpoq.
Tusagassiortut, aaqqissuisut tusagassiuutinillu ingerlatsisut ukiut 25-iinnaat matuma siornagut isumaqartarput, atuartartut nutaarsiassanik pissarsiniarlutik aviisinik pisisartut.
- Tamanna periaaserineqartutut kukkunerujussuuvoq – tamannalu Danmarkimi tusagassiorfippassuit ullumikkut ajutoorutigisarpaat millionilikkaanik amigartooruteqartarnermikkut soraarsitsiortortuartarlutillu, tusagassiorfimmi Sermitsiami siulersuisuni siulittaasoq Lars Vesterløkke taama isumaqarpoq.
- Ikittunnguilli taamaanngillat, soorlu Bornholms Tidende aamma Tusagassiorfik Sermitsiaq, tamarmik siorna 1,5 millionit koruunit missaannik sinneqartooruteqarput. Inuussutissarsiortunut aviisi Børsen aamma sinneqartooruteqarpoq.
- Internet inoqatinut attaveqaqatigiittarfiilluunniit sioqqullugit aviisinik pisinissamut pissutissarpassuaqarsimavoq. Aviiseqaranimi nalinginnaasumik inuusoqarsinnaanngilaq. Nutaarsiassat tamatumani pissutaanngillat, ussassaarutilli pissutaallutik, tassami filmertarfinni isiginnaartitsisarfinnilu suut ingerlanneqarnersut aviisitigut takuneqarsinnaasarmata. Aviisitigut suliffimmik nassaartoqarsinnaasarpoq, inissiamillu nutaamik pissarsisoqarsinnaasarluni. Tamanna tusagassiuutinut aningaasatigut isertitsissutaasarpoq, isertitallu nutaarsiassaqartitsivimmut atorneqartarlutik – tassa nutaarsiassalerinermut.
Aningaasarsiorfiujunnaartoq
- Aningaasarsiorfik tamanna maanna – aningaasarsiorfiujunnaarpoq, ingammik Danmarkimi nutaarsiassaqartitsivinni. Tamanna Internetimit aamma inoqatinut attaveqaqatigiittarfinnit isumagineqalersimavoq. Taamaalilluni ussassaarutinit isertinneqartartut ilarpassui teknologiimik suliffeqarfissuarnut tuttalerlutik, aviisinik saqqummersitsisartunut pisarunnaarlutik. Tusagassiorfiit suliarisartakkaminnit – nutaarsiassalerinermit allaanerusunik aningaasarsiorfissarsiortariaqarput. Ineriartornerummi takutereermagu tusagassiorfiit ussassaarutinit isertinngitsuukkatik aviisinik pisartagalinnit
Tusagassiuutit pingaarnertut suliassaminnit – nutaarsiassanit – aningaasarsiortariaqarput. Ineriartornermimi takuneqarsinnaammat tusagassiorfiit ussassaarutinit isertittakkatik aviisinik pisartagalinnit isertiinnarsinnaanngikkaat, Lars Vesterløkke nassuiaavoq.
- Sipaarniartoqartussanngoraangat, pitsaanngitsumik uteqattaartoqalersarpoq – taava Danmarkimi tusagassiorfinni amerlasuuni takusimasatsitut pisoqartarpoq, tassa aviisit akisunerulerlutillu qupperneri ikinnerulersarput. Tamanna piffissami sivisunerusumi attanneqarsinnaanngilaq.
- Kalaallit Nunaanni pikkorillutalu iluatsitsisimavugut, taamaammat Tusagassiivik Sermitsiaq suliffissanik inuttassarsiuussisarnerminik ingerlatsiinnarsinnaasimavoq. Niuernermut tunngatillugu aamma sunniuteqarsimassaaq tusagassiivik aviisinik pisartagaqarnernit isertitaqaannarani aamma aviisinik tapiliussanik suliaqartarmat, aamma Air Greenlandip timmisartumi atuagassiaataanik Sulummik saqqummersitsisarmat.
- Kingullertut inuussutissarsiortut pisartagaqarsinnaanerat atuutilersipparput, taamaalillutik suliffeqarfiit aviisit pdf-inngorlugit pissarsiarisinnaalissallugit, aammattaaq Nutserisoq.gl-imut isersinnaalerlutik. Tusagassiorfiup inuussutissarsiortunik suliffeqarfinnillu suleqateqarnera inuiaqatigiinnut kalaallinut tamanut iluaqutaavoq, isertitammi nutaarsiassanik pitsaasunik suli pilersuinissamut iluaqutaammata.
Neqeroorut pitsaasoq
- Aamma taamaattariaqarpoq. Kikkummi tamarmik pissarsisariaqarput. Suliffeqarfiit sulisuminnut aviisinik neqerooruteqaraangamik sulisunik pikkorissunik, suliffimmi tatineqartumi amigaataasinnaasunik, atorfinitsitsiniarlutik iliuuseqartarput. Sulisullu inuiaqatigiinni oqallinnermi malinnaasut peqataasullu suliffeqarfinnut naleqaqaat, Lars Vesterløkke isumaqarpoq.
- Tamatuma akerlianik tusagassiuutinik atuarneqartartunik pilersuisarpugut – tamannalu ussassaarisunut suliffeqarfinnullu pitsaasuuvoq. Inuiaqatigiinnut kalaallinut pingaaruteqarpoq tusagassiuutinik kiffaanngissuseqartunik attuumassuteqanngitsunillu inuiaqatigiinni oqallinnermut peqataasinnaasunik peqarmat. Tamanna Kalaallit Nunaanni tamanut pitsaasuuvoq.
- Kiisalu aamma pingaaruteqarpoq Tusagassiorfik Sermitsiaq ingerlalluartuummat, sulisut misilittagartuut ullut tamaasa suliaqarluartarlutik, – tassaasut aviisiliortut, quppernernik ilusilersuisartut, nutserisut, allaffimmiut imaluunniit tuniniaanermi sulisorineqartut. Taama suliaqartut suusupagineqarsinnaanngillat – ineriartortitsinermummi tapersersueqataammata, soorlumi tamanna nittartakkap nutaap saqqummiunneqarneranut atatillugu takusinnaagipput.
- Tamanna peqataaffigalugu nuannerpoq – taamaattumillu tusagassiorfimmi siulersuisuni siulittaasutut ingerlaqqinnissannut akuersivunga, naak maanna ukiut 15-it missaanni Ritzauimi pisortaaninnit aaqqissuisutullu suliunnaaraluarlunga.
