Savalimmiuni takornariartitsisarneq iluatsilluartoq Sermersuup ilaarniarpaa

Savalimmiuni oqaaseq „heimablídni“ isumaqartoq „inoroorsaarnissaq“ Tunumi takornariaqarnerulersitsiniarluni nunaqavissullu aningaasarsiornerulersitsiniarlugit suliniummut qitiuvoq.

Inuussutissanut inatsisilli pissutigalugit periuseq tamanna piviusunngortinneqarsinnaanngilaq, kommunilli neriuutigaa namminersorlutik oqartussat namminneq misiliinikkut inatsisitigut akornutaasinnaasut qaangerniassagaat.

Kommuneqarfik Sermersuumi kommunalbestyrelsip marsip aqqaneq-aappaanni ataatsimiinnerani aalajangerneqarpoq Namminersorlutik Oqartussanut qinnuteqartoqassasoq, isumaqartoqarmat taamaaliorneq kommunip takornariaqarnermut politikkianut tapertaassasoq.

Takornariaqarnermut politikki

Suliniummik ilusilersuisoq tassaavoq Semersooq Business, taannalu takornariaqarnermut politikkimik tapersersuinissamut tunngatillugu immikkoortunik tallimanik ima nassuiaateqarpoq:

• Tamanut takornariaqarneq – Suliniut tamanut takornariaqarnermut tapersersuivoq, angerlarsimaffiit tamarmik takornarianik pulaartitsinermikkut kulturikkut naapeqatigiinnermut peqataanissamut aningaasarsiornissamullu periarfissinneqassallutik.

• Eqqortumik sinaakkutissat piginnaanerillu – Suliniut takornariartitsinermut sinaakkutissat pitsaanerulersinniarlugit nioqqutissanik nutaanik akuersissuteqarnermik kinguneqassaaq.

• Angalaffissat patajaatsut – Frikommunit misiliutigineqarneratigut Tunumi misileraanerup nalaani immikkuullarissumik tunisassiortoqassaaq, tamannalu corona pissutigalugu matusinerup kingorna, Islandimit tikittunut takornariartitsinerup unittoorsimaneranit, takornariaqarnerup aallarteqqinnissaanut iluaqutaasinnaavoq.

• Pinngortitaq kulturilu pisuussutitut inuiaallu erlinnartuutaattut – Suliniummi pineqarput nunap piisigut pisuussutit, Kalaallit Nunaanni Tunumilu nerisassiornerup kulturillu immikkuullarissup ataqasigiitsilernissaat.

• Takornariaqarneq aningaasaqarnikkut inuttullu ataatsimut isigalugu piujuartitsisumik inuussutissarsiutitut – Suliniut Kalaallit Nunaanni kaffellertariaatsip nerisassiornermillu kulturip immikkuullarissup takornariaqarnerup ineriartorneranut ilanngunnissaanut iluaqutaasinnaavoq, aamma inunnut tamanut inissaqartitsisumik inuiaqatigiissutsikkut kulturikkullu piujuartitsisumik takornariaqarnerup ineriartortinnissaanut qulakkeerinnissinnaalluni.

Misiliut akuerineqassappat nalilersorneqarsinnaanera piareersimaffigineqarpoq, „siunissami iluaqutaasinnaaneranik nunamilu tamarmi atorsinnaalernissaanut periarfissanik allattorfimasuutigineqartussanik paasisanik katersisoqassalluni“.

Immikkut ittumik akuersissut

Inuussutissanut inatsisini paragraffini arlalinni immikkut ittumik akuersissuteqartoqartariaqarpoq, tamannalu Sermersooq Businessimit ima nassuiarneqarpoq:

- Kommuneqarfik Sermersooq paragraffinit taakkunannga immikkut ittumik akuersissuteqartitsinissamut qinnuteqarsimavoq, tassanimi inuit namminneq angerlarsimaffimminni nerisassanik tuniniaasinnaapput nalunaarsorneqarsimanatik oqartussanillu akuersissuteqartinnatik. Aammattaaq immikkut ittumik akuersissuteqartitsinissap qulakkiissaavaa nerisassat isumannaatsuunissaannut piumasaqaatit suli atuutsinneqarnissaat, oqartussallu peqqissutsimut isumannaallisaaneq pillugu suli matutitsisinnaanissaat qulakkeerneqaannassalluni, qinnuteqaammi ilisimatitsissutigineqarpoq.

Misiliineq 2026-p naanissaata tungaanut ingerlanneqassasoq pilersaarutigineqarpoq. Paasititsiniaasoqassaaq, aamma Sermersooq Businessip misiliineq aningaasaqarnermut peqqinnissamullu tunngasut tunngavigalugit nalilersorumaarpaa, apeqqutinik immersugassaq atorlugu apersuinermilu.