Nipisanniarneq ilungersunartumik aallartikkaluarluni naammassilluarpoq
Akit pillugit saqitsaattoqarnera pissutigalugu nipisanniarneq ukioq manna aamma kinguartinneqarnikuuvoq. Taamaakkaluartoq Royal Greenlandip nipisat suaannik 2022-mit amerlanerusunik tigooraanini iluatsippaa.
Nipisanniarneq sumiiffiit ilaanni aallartiffigisinnaasaminit ullut 18-t kingusinaarluni aallartikkaluartoq, annertuumik tunisisoqarpoq.
Royal Greenland 983 tonsinik tigooraavoq, tigooqqakkallu Royal Greenlandip tigooragassatut anguniagaanit 905 tonsiusunit annertunerupput, tamatumalu peqatigisaanik suaat annertussusaat 2022-mi tigoorarneqartunut sanilliullugit 168 tonsimik annertusipput.
Ukioq manna tigooqqakkat Royal Greenlandip oqaluttuarisaanerani annertunerpaat ilaanniipput, Royal Greenlandimi ingerlatsinermut aqutsisoq, Møller Lyberth, tusagassiuutinut nalunaarummi taama ilisimatitsivoq:
Agguaqatigiissillugu aalisartunut 69.000 kr.-t
- Kingusinnerusukkut aallartikkaluarluta ingerlalluarpugut. Aalisartut taama amerlatigisut ulapaarfiup nalaani maanga tunisissallutik aalajangersimanerat nuannaarutigalugulu usorsisimaarutigaarput, taanna oqarpoq.
Royal Greenlandip tulaanneqartut 71 procentiisa missai tigooqqarpai.
Aalisartut nipisat suaannik (piffissami apriilip 18-ianiit juunip 1-ianut) Royal Greenlandimut tunisisimasut agguaqatigiissillugu isertaat 69.000 koruuniusut, ingerlatseqatigiiffik ilisimatitsivoq.
Aalisartut tunisinerpaat qulit piffissami pineqartumi agguaqatigiissillugu 251.000 kr.-inik isertitaqarput. Aalisartup ataatsip tunisaqarnermini isertai annertunerpaat 304.000 kr.-iupput, Royal Greenland allappoq.
Aallartinneq ilungersunartoq
Aalisarnerup aallartinnginnerani aalisartut tungaannit akerliussutsimik takutitsiniartoqarpoq.
Royal Greenlandip akitinniakkamut siunnersuutaa aalisartut piniartullu kattuffiata KNAPK-p akueriumanngilaa, kisianni Royal Greenlandip 18. april tunisinermi aki 4 koruuninik qaffappaa, isumaqatigiittoqarneralu illuatungeriit nalunaarutigaat, aalisarnerlu aallartinneqarsinnaanerarlugu.
Aalisarneq aallartimmat suannik piffissap sivikitsup ingerlanerani annertuumik tunisisoqarnera pissutigalugu, tunisassiorniarneq tatineqartoq, Kujataani tunisassiorfinnit nalunaarutigineqarpoq. KNAPK-mi najukkami siulittaasoq sakkortuumik isornartorsiuivoq, tunitsiviillu malinnaajumallutik tunisinernik unitsitsigallartariaqarsimanerat isornartorsiorpaa.
Narsami tunisinerit marloriaatinngortut
Ulapaarfiup nalaani piffissap sivikitsup ingerlanerani ilaatigut annertuunik tulaassuisoqarpoq. Tamanna silaginneranik ukioq mannalu nipisaqarluarneranik ilaatigut peqquteqarsorineqarpoq, Royal Greenland allappoq.
- Tunitsivitsinnili ingerlalluarpugut, Møller Lyberth ilanngullugu oqarpoq.
Royal Greenlandimit kisitsisit tigooqqakkanut tunngasut naapertorlugit, Kujataani tulaassuineq iluatsilluarpoq, ingerlatseqatigiiffiup Narsami tunitsiviani 61 tonsit tunineqarmata – ukiup siulianut sanilliullugu marloriaataat sinnerlugit amerlanerullutik.