Namminersorlutik Oqartussat sanaartortunut ikiuisut

Sanaartornermik suliaqartut ukiuni arlalinni suliassaaleqinngereerlutik maanna suliassameerput. Taamaattoqarnera Ineqarnermut Attaveqaasersuutinullu naalakkersuisumit iliuuseqarfigineqarpoq.

- Sanaartornermik suliaqartunik ataavartumik oqaloqateqartarnissamik, pisortani sanatitsisutut qulakkeerinissarput pingaaruteqarpoq. Sanaartornerup ingerlalluarnissaa, nunatut annertuumik soqutigisaraarput. Sanaartorneq nunami suliassaqartitseqataammat, piginnaasanik ineriartortitseqataammat, inuusuttatsinnillu ilinniarsimasunik pigiinnartitseqataammat, nunap ineriartortinneqarnissaanut annertuumik pingaaruteqarpoq, Hans Peter Poulsen tusagassiutinut taama nalunaaruteqarpoq.

Ilinniartut ineqarfiinik sanaartorneq

Suliaqarfiup noqqaassutaa qisuariarfigalugu, pilersaarutip ’Ilinniartut ineqarfii nalinginnaasut Immikkoortoq 2, Nuuk’ neqeroortitsissutigineqarnissaata siuartinneqarnissaa Naalakkersuisut 2024-mi februaarimi akuersissutigaat. Pilersaarut 2024-p ukiaani aallartinneqartussatut naatsorsuutigineqarluni neqeroorutigineqarpoq. Siuartitsinissaq iluaqutaassalluni pilersaarutinik allanik nukingernartoqarnersoq, Ineqarnermut Attaveqaasersuutinullu Naalakkersuisoqarfiup ataavartumik nalilersortassagaa ilanngullugu nalunaarummi allassimavoq.

- Tassunga tunngatillugu paasissutissiissutigineqarsinnaavoq, Namminersorlutik Oqartussat 2024-mi sanaartornermi annertuunik pilersaaruteqassamaarlunilu nutarterinissami annertuumik pilersaaruteqassamaarmat. Pilersaarutit taakkua sanaartornermi aamma suliassaqartitseqataasinnaasut naatsorsuutigineqarpoq.

Sanaartugassanik suliassinneqartartut, siunnersorteqarfiit arlaqartut taavalu teknikkikkut sulialinnut siunnersuisartut, Sulisitsisullu entreprisemut ataatsimiititaliaa arlaleriarlutik saaffiginnittareersullu Naalakkersuisut maanna qisuariaateqarput.