Miki Jensen pisortanngorpoq

Miki Jensen politikkikkut, kulturikkut, pisortani ingerlatsinermi nittarsaassinermilu suliassaqarfinni ilisimasaqarluarpoq, tamatumuunakkullu Kalaallit Nunaanni attaveqarnissamut suleqatinullu paasinnilluarnissamut piginnaassuseqalersimavoq, tamannalu pissutigalugu pisortatut nutaatut siulersuisut toqqarpaat.

Tusagassiutilerinermik Ersittunillu Kulturilerinermik bacheloritut ilinniagaqarsimavoq.

2024-mi maajip aallaqqaataani Miki Jensen ISG-mi pisortanngussasoq, Kommune Kujalleq nittartakkamini allappoq.

- Kujataani peroriartorsimanera kujataanullu asanninnera tunngavigalugit Innovation South Greenlandimi sullissinissamik periarfissinneqarninnik erinisuppunga. Aammattaaq ilisimasama piumassutsimalu ajunngitsumik ineriartortitsinissamut atornissai kiisalu kujataani akimut peqatigiinnikkut suleqatigiinnissamut tapersiinissannut qilanaarlunga. 

- Suleqatit, kujataani inuiaqatigiit inuussutissarsiortullu peqatigalugit kujataata siunissaa ineriartornermik isumassarsiorfiunissaanillu ataatsimoorluta tunniusimallutalu peqataaffigissavarput, Miki Jensen oqarpoq.

Kajumissuseqalersitsiviusumik anguniagaqartoq

Miki Jensenip atorfinitsinneqarnera ISG-mi siulersuisuni siulittaasup nuannaarutigaa:

- Miki Jensenip pisortanngorneratigut suliffimmik kajumissuseqalersitsiviusumik anguniagaqartoq, suleqateqarnermik pingaartitsisoq, nutaaliullaqqissoq aaqqiissutissanillu ujartuisartoq pisortartaaraarput. Mikip Qaqortumi inunngorlunilu peroriartornera aamma iluaquterujussuuvoq, maanna isummat isiginnittaaserlu nutaat kujataanut iluaqutaasussat nassarlugit angerlartussanngorpoq, siulersuisuni siulittaasoq Steffen Lund, oqarpoq.

Miki Jensen Folketingimi Inatsisartunilu politikkikkut suliaqarfiit assigiinngitsut misilittagaqarfigai, suliniutit nutaaliat aqutsisuuffigisimallugit kingullertullu Air Greenlandimi Branding Account Manageritut sulisimalluni, tassanilu nunatsinni avammullu nittarsaassineq, niuernikkut suleqatit ussassaarinerillu akisussaaffigisimallugit, Kommune Kujalleq allappoq.